Явган хүний зорчих хэсэгт саад болж, хотын өнгө үзэмжийг алдуулж байгаа шалтгаанаар  нийтийн эзэмшлийн гудамж, талбайд зөвшөөрөлгүй байршуулсан ТҮЦ-үүдийг нүүлгэн шилжүүлж байна. Гэсэн ч ТҮЦ эрхэлж амь, амьжиргаагаа залгуулдаг иргэд энэ ажлыг эсэргүүцэн Сүхбаатарын талбайд цугларчээ.

Тэд “ТҮЦ-тэй биш архитай тэмц. Шөнө архи зардгийг болиулах хэрэгтэй”. “Хотын дарга Х.Нямбаатар огцор”. “Бид төрдөө боомилогдсон иргэд” гэх мэтчилэн үгтэй лоозон барьжээ.

Нийслэлийн төвийн зургаан дүүрэгт нийт 1100 орчим ТҮЦ зөвшөөрөлгүй үйл ажиллагаа явуулдаг. Үүнээс өнөөдрийн байдлаар нийт 46 байршилд зөвшөөрөлгүй байршуулсан 645 ТҮЦ-ийг нүүлгэн шилжүүлжээ. Энэ ажлыг нийслэл, дүүргийн Засаг даргын захирамжаар гүйцэтгэж буй юм.

Харин Хотын дарга Х.Нямбаатар “Олон хүний амьдрал яригдаж байгаа учраас ТҮЦ-ийн үйлчилгээ эрхэлж байсан хүмүүсийн төлөөлөлтэй уулзаж, НЗДТГ-аас хоёр санал тавьсан. Бид эхний ээлжид нийслэлийн төр захиргааны бүх байгууллагуудад ажиллах санал тавьсан. Мөн Нарантуул, Хархорин зэрэг зах худалдааны төвүүдэд лангуу түрээсэлж, бүтэн жилээр нь төлбөрийг нь төлж өгье гэдэг санал тавьсан ч ТҮЦ-ээ ажиллуулмаар байна гэдэг зүйл ярьж байна. Хотын зүгээс ТҮЦ-үүдийг нүүлгэн шилжүүлэх ажлыг зогсоохгүй. Зам талбайг чөлөөлж иргэдэд саадгүй зорчих боломжийг олгоно"  хэмээгээд буй.