УИХ-ын чуулганы нэгдсэн хуралдаан эхэллээ.  

УИХ-ын чуулганы нэгдсэн хуралдаанаар АТГ-ын даргаар Зандраагийн Дашдавааг улируулан сонгох тухай Ерөнхий сайдын саналыг хэлэлцэж эхэллээ.  

АТГ өнгөрсөн хугацааанд Гадаад улсын ижил чиг үүрэг бүхий байгууллага болон олон улсын байгууллагатай хамтран ажиллаж, гадаад улсад байгаа гэмт хэрэг үйлдэж олсон хөрөнгө орлогыг битүүмжлэх, хураан авах, хөрөнгө буцаан авах үйл ажиллагааны хүрээнд 2021-2024 онд нийт 13.9 сая ам.долларын үнэ бүхий хулгайлагдсан хөрөнгийг улс орондоо буцаан авчирч, улсын орлого болгожээ.

Мөн хуулийн дагуу ХАСХОМ гаргагч нийтийн албан тушаалтан өөрийн болон гэр бүлийн гишүүдийн татвар ногдох орлогоо үнэн зөв мэдүүлээгүй нөхцөл байдлыг шалган 2023 онд 8.3 тэрбум төгрөгийн зөрчил илрүүлж, 637 сая төгрөг, 2024 онд 2.1 тэрбум төгрөгийн зөрчилд 136.4 сая төгрөгийн нөхөн татвар, торгууль, алданги ногдуулж барагдуулсан гэж З.Дашдаваа УИХ-д ажлаа тайлагнасан. 
 

Зандраагийн Дашдавааг УИХ-ын 2019 оны 37 дугаар тогтоолоор Авлигатай тэмцэх газрын даргаар томилсон бөгөөд бүрэн эрхийнхээ хугацаанд хуульд заасан чиг үүргээ хариуцлагатай, шударгаар, үр дүнтэй хэрэгжүүлэн ажилласан хэмээн дүгнэж, Ерөнхий сайдын түвшинд анх удаа улируулан сонгох санал гаргажээ.

З.Дашдаваа нь:

• 1974 онд Хэнтий аймгийн Өндөрхаан хотод төрсөн. 51 настай, яс үндэс халх.
• Хуульч мэргэжилтэй, хууль зүйн ухааны доктор,
• 1995-2019 оныг хүртэл цагдаагийн байгууллагад хэрэг бүртгэгч эрүүгийн төлөөлөгчөөс эхлээд Цагдаагийн ерөнхий газрын Дотоод хяналт шалгалт, аюулгүй байдлын хэлтэс, тасгийн дарга, хэлтсийн дарга, дэд даргаар дэвшин ажилласан.
• 2019 оноос АТГ-ын даргаар томилогдон ажиллаж байна.
• Тэргүүн комиссар З.Дашдаваа нь цагдаагийн байгууллагад 24 жил, Авлигатай тэмцэх газарт зургаа дахь жилдээ, хууль сахиулах байгууллагад 30 дахь жилдээ ажиллаж байна. 

УИХ-ын гишүүн С.Эрдэнэболд, Ерөнхий сайдын саналын дагуу үргэлжлүүлэн ажиллах итгэл үнэмшил танд байна уу?

З.Дашдаваа, АТГ байгуулагдаад 19 жил болж байна. Би 5 дахь дарга нь юм. Мөн бүрэн эрхийн хугацаагаа гүйцээсэн анхны дарга нь юм. Өмнөх дарга нар тодорхой хугацаанд ажиллаад ажлаа өгч байсан. 19 жилийн хугацаанд авлигатай тэмцэх байгууллага тодорхой туршлага хуримтлуулсан, өөрийн гэсэн боловсон хүчинтэй болсон. Тийм учраас Ерөнхий сайдын саналыг хүлээж аваад, дараагийн 6 жилд ажиллахад бэлэн байна.

Ирэх 6 жилд бид хүнтэй тэмцэхээс илүү тогтолцоотой тэмцье гэж үзэж байна. хуулиас давсан журам, шийдвэрүүд гаргаж, төрийн албан тушаалтнууд асуудлыг хүндрүүлдэг гажуудлыг УИХ, ЗГ-тай хамтарч тодорхой ахиц гарган ажиллана гэж бодож байна. ХЗДХЯ-д бүртгэлтэй, бүртгэлгүй журмуудыг цэгцлэх чиглэлээр ажлуудаа эхлэх гэж  байна.

Том загас барихгүй, жараахай бариад байна гэж шүүмжилдлэг. Эрүүгийн хэрэг хийсэн том, жижиг албан тушаалтнуудтай тэмцэх, хариуцлага хүлээлгэх чиглэлээр үргэлжлүүлэн ажиллана. 

Гишүүд асуулт тавьж, хариулт авсны дараа З.Дашдавааг АТГ-ын даргаар улируулан томилохыг дэмжих, эсэх талаар санал хураалт явуулахад хуралдаанд оролцсон гишүүдээс 93 нь дэмжсэнээр З.Дашдаваа АТГ-ын даргаар хоёр дахь удаагаа томилогдлоо.