УИХ-ын гишүүн, Үндэсний эвслийн гишүүн Д.Пүрэвдаваа байр сууриа илэрхийлж, сэтгүүлчдийн асуултад хариуллаа. 

Тэрээр, "Олонх болсон нам маань 2025-2027 оныхоо буюу сонгуулийн цикл буюу үлдэж байгаа гурван жилдээ, улсаа яаж хөгжүүлэх вэ гэдэг эдийн засгийн уялдаа холбоотой тооцоо судалгаагаа гаргаад, түүнийхээ дагуу үйл ажиллагаагаа төлөвлөх байх гэж харж байна.

МАН парламентад 68 суудалтай. Бусад намаас 58 нь бүрдэж буй. Ингээд тооцоод үзвэл тооны зөрүү нь 10 боловч тавхан хүний наана, цаанын л асуудал.

Энэ 68 дангаараа бүлэг байгуулах юм бол цаана нь 58 хүн сөрөг хүчний талд гарч байгаа юм. Ийм харьцаатай байвал маш их тогтворгүй байх магадлалтай гэдгийг ямар ч энгийн хүн логикоор бодоод олчих байх.

Үндэсний эвсэл буюу манай дөрвөн гишүүн хамтарсан ЗГ-т орох эсэх асуудлаар ярилцаагүй байна. Түүнээс гадна манайд албан ёсоор урилга, санал ирээгүй байна.

УИХ-ын гишүүнийн хувьд, эхлээд хэн Ерөнхий сайд болох вэ гэдэг нь чухал байна. Ялангуяа авторитар дэглэм рүү орсон, хүний эрх зөрчигдсөн, бараа бүтээгдэхүүний үнэ хэт өссөн, утаа, түгжрэлийн асуудлыг шийдвэрлэж чадахуйц улс төрч болоод зөв төлөвлөгөө байна уу гэдгийг сонсож байж бид нар шийдвэрээ гаргах ёстой.

Хамтарсан ЗГ байгуулах "Хөгжлийн хурд" гэх жигтэй нэртэй гэрээ хийсэн гэсэн. Ил болго. Гурван намын удирдлагын түвшинд мэдээлэлтэй байгаа гэрээ гэж ойлгосон.

УИХ-ын оролцоогүйгээр намын түвшинд шийдвэр гаргаад ЗГ-ыг огцрууллаа

-Ерөнхий сайд огцрох өргөдлөө өгвөл та ямар санал өгөх вэ?
-Тэр хүн өргөдлөө өгөх нь хувь хүнийх нь л асуудал байлгүй дээ. Өргөдлөө өгч байвал, дэмжээд л явна. 

Ерөнхийлөгч бол зургаан жил ажиллана гэдэг. Тэгвэл Монгол Улсад Ерөнхий сайдаар ажиллаж ханах хугацааг таван жил гэж би бодож байна. Юу хийж чадахаа харуулах хангалттай хугацаа" гэв.