Нийтийн тээврийн газраас цаг үеийн асуудлаар мэдээлэл хийж байна. 

2019 оны дөрөвдүгээр сард тус газраас

• Ч:7 "Нисэх-Төв номын сан-7 буудал-Зунжин",
• Ч:43 "Баянхошуу-Ард кино театр-ТЭЦ3",
• Ч:24б "Чингэлтэй-3,4-р хороолол-Гурвалжингийн гүүр-ТЭЦ4" чиглэлүүдийн замналд өөрчлөлт оруулан богино эргэлтээр явуулж, эдгээр чиглэлд иргэдийн автобус хүлээх хугацааг 3-7 минутаар бууруулсан.

Мөн 

Ч:24 а "Зунжин-3,4-р хороолол-Сонсголон-ТЭЦ4" чиглэлийн эцсийг Чингэлтэй болгон өөрчилж, зорчигч урсгал 3 хувь өссөн. 

Ч:54 "Яармаг-10-р хороолол-3,4-р хороолол-Зурагт" чиглэлийн эцсийг Баянхошуу болгон өөрчилж, зорчигч урсгал 17 хувиар тус тус өссөн байна.

ЭКСПРЕСС ЧИГЛЭЛ БИЙ БОЛГОЛОО

Улаанбаатар хотын гол гудамж, замуудаар нийтийн тээврээр зорчиж буй иргэдийн хурдан шуурхай явах нөхцөлийг бүрдүүлэх зорилгоор шинээр 3 экспресс чиглэлийг нээн тавдугаар сарын 20-ны өдрөөс үйлчилгээг эхлүүлэхээр болсон. Эдгээр экспресс чиглэлүүд нь үуурхай үйлчилгээ үзүүлэхийн тулд зөвхөн тогтсон тодорхой зогсоолуудад зогсож зорчигчдод үйлчилнэ. 

Экспресс 1 чиглэл: "5 шар-Зүүн 4 зам"

Тус чиглэл нь Энхтайваны өргөн чөлөөгөөр 5 шараас Зүүн 4 зам хүртэл үйлчлэх бөгөөд 5 шар, Хархорин, Саппоро, 10-р хороолол, 25-р эмийн сан, Баруун 4 зам, улсын их дэлгүүр, Сүхбаатарын талбай, Өргөө амаржих газар, Зүүн 4 зам гэсэн 10 зогсоолд зогсож шуурхай үйлчилгээ үзүүлэх болно. 

Ингэснээр оргил ачааллын үеэр хамгийн их ачаалал авдаг зогсоолуудын ачааллыг 20 орчим хувиар бууруулж ашиглалтын хурдыг нэмэгдүүлснээр иргэдийн зорчилтод зарцуулах хугацааг 15 минутаар багасгах юм.

Экспресс 2 чиглэл: "5 шар-Бөмбөгөр-Хөгжим бүжиг"

Тус чиглэл нь 5 шараас хойгуураа буюу Самбуугийн гудамжаар шуурхай үйлчлэх чиглэл бөгөөд 5 шар, 32-р байр, Саппоро, 10-р хороолол, 25-р эмийн сан, Элба дэлгүүр, Бөмбөгөр худалдааны төв, Чингэлтэй дүүрэг, МУИС, хөгжим бүжгийн коллеж гэсэн 10 зогсоолд зогсож үйлчилнэ.

Ингэснээр Энхтайваны өргөн чөлөө болон Самбуугийн гудамжны ачаалал ихтэй цэгүүдийн ачаалал 25 орчим хувиар буурч хамгийн их зорчилт эрэлт үүсдэг их сургуулиудын бүсэд шуурхай хүрэх боломжтой болох юм. 

Мөн тухайн гудамж замаар дайран өнгөрөхөд зарцуулах хугацаа бусад чиглэлүүдтэй харьцуулахад 10 минутаар багасна. 

Экспресс 3 чиглэл: "Зунжин-7 буудал-Ард кино театр-ТЭЦ3"

Босоо чиглэлд буюу Зунжин худалдааны төвөөс ТЭЦ-3 хүртэл шуурхай үйлчлэх чиглэл нь 7 буудал, 17-р сургууль, 32-ын тойрог, Хүнсний 4 дүгээр дэлгүүр, Хүнсний нэгдүгээр дэлгүүр, ард кино театр, Баянгол зочид буудал, 120 мянгат, ажилчдын соёлын ордон, Таван богд компани, ТЭЦ3 гэсэн 12 зогсоолд зогсож үйлчилнэ.

Ингэснээр босоо тэнхлэгтээ буюу Чингэлтэйн өргөн чөлөө, Чингисийн өргөн чөлөөний ачаалал ихтэй цэгүүдийн ачаалал 20 орчим хувиар буурах боломжтой. Мөн тухайн гудамж замаар дайран өнгөрөхөд зарцуулагддаг хугацаа бусад чиглэлүүдтэй харьцуулахад 10 минутаар багасна.

Үүнээс гадна нийтийн тээврийн үйлчилгээнд Ч:30 “Жанжин клуб-Дамдинсүрэнгийн гудамж-МУБИС-Ард кино театр”, Ч:70 “ТЭЦ3-Нарны гүүр– Бөмбөгөр – Ард кино театр”  чиглэлийн өөрчлөлтүүд орсон байна. Мөн маргааш болох “Автомашингүй өдөр”-ийн үеэр иргэдэд троллейбус үйлчлэхгүй бөгөөд нийтийн тээврийн 40 чиглэлийн 344 тээврийн хэрэгслийн чиглэл, замналд өөрчлөлт орно.