УИХ-ын чуулганы нэгдсэн хуралдаанаар Монгол Улсын нэгдсэн төсвийн 2018 оны гүйцэтгэл, Засгийн газрын санхүүгийн нэгтгэсэн тайлан болон “Монгол Улсын 2018 оны төсвийн гүйцэтгэлийг батлах тухай” Улсын Их Хурлын тогтоолын төслийг хэлэлцэж байна.

Төсөл нь Засгийн газар өргөн мэдүүлсэн, хоёр дахь хэлэлцүүлэг юм.

Сангийн сайд Ч.Хүрэлбаатар өнгөрсөн онд ганц ч гоё нэртэй бонд гаргаагүй, төсөв ашигтай гарсан гэдгийг онцоллоо. 

УИХ-ын гишүүн З.Нарантуяа "Төсвийн гүйцэтгэлийг дараа оныхоо эхний зургаан сард хэлэлцэж баймаар байна. Одоо 2020 оны төсөв хэлэлцэх гэж байхад ямар ч үр дүнгүй, үр ашиггүй зүйлийг нэр төдий яриад сууж байна. Нарийвчлан ярих зүйл их байсан" гэдгийг хэлсэн юм. 

Харин УИХ-ын гишүүн Т.Аюурсайхан манай улсын гадаад өр 29.6 тэрбум америк доллар байгааг дурдаад өрийн удирдлагын тал дээр ямар арга хэмжээ авч ажиллаж байгааг асуусан юм. 

Үүний хариуд Сангийн сайд Ч.Хүрэлбаатар "Гадаад өрийн хэмжээ 29.7 тэрбум доллар. Үүний 18.2 тэрбум буюу 61.2 хувийг аж ахуйн нэгж, байгууллага авсан. Үүнд Оюу толгойн хөрөнгө оруулалт буюу 9 орчим тэрбум доллар ч өрөөр тооцогдож байгаа. Банкуудын  авсан өр 2.2 тэрбум , Засгийн газрынх 7.2 тэрбум ам.доллар. Үлдсэн 4 орчим тэрбум ам.доллар нь 2000 оноос хойшхи эрчим хүч, эрүүл мэнд гэх салбарт авсан зээл тусламж эзэлж байна" гэлээ. 

УИХ-ын чуулганы хуралдаанд 56 гишүүн оролцож, 67.9 хувийн саналаар 2018 оны төсвийн гүйцэтгэлийг баталлаа.