"Түрүүлж алхана" уриатай Юнител групп Монгол орон даяар 4G LTE сүлжээг анхлан нэвтрүүлж буйгаа өнөөдөр зарлалаа. Зөвхөн Улаанбаатар хотод нэвтрээд байсан өндөр хурдны, хөдөлгөөнт интернет сүлжээ ийнхүү 21 аймгийн бүх сумдад нэвтэрч байна.

Ингэснээр Монгол улс орон даяараа 4G LTE сүлжээ нэвтрүүлсэн дэлхийн 25 орны нэг болж байгаа аж. Энэ оны дөрөвдүгээр сард Юнител групп Монгол улсад анх удаа 4G LTE сүлжээг нэвтрүүлж байв.

Тэгвэл өнгөрсөн хэдхэн сарын хугацаанд орон даяар өндөр хурдны 4G LTE сүлжээг нэвтрүүлж, ашиглалтад оруулж байгаа талаар Юнител группын Ерөнхий захирал Р.Ганболд өнөөдөр зарлалаа.

Монгол улсын өнцөг бүрт ажиллаж, амьдарч байгаа хэрэглэгчдэд өмнөх үеийн сүлжээнээс 10 дахин хурдан мэдээлэл хүлээн авах боломж бий болж байна. Аль ч сумын иргэд Улаанбаатар эсвэл дэлхийн өндөр хөгжилтэй бусад хотод амьдарч буй иргэдтэй адил хурдаар интернетэд холбогдох боломжтой боллоо.

Энэ том сүлжээг байгуулахын тулд Юнител групп 80 тэрбум төгрөгийн хөрөнгө оруулжээ. Ийнхүү хэрэглэгчиддээ дэлхийн хөгжлийг мэдрүүлэхийг зорьсон нь сайшаалтай.