Европт тогоочийн мэргэжлээр таван жил сурахдаа алтан медалтай төгсөж, нийтдээ 12 жил дээд зэрэглэлийн ресторануудад ажиллаж байгаад ирсэн хүн Монголд цор ганц.

Иймдээ ч Д.Буянг Монголд ирүүтээ хамгийн шилдэг үйлчилгээтэй гэгддэг “Централ тауэр”-ийн “Monet” рестораны Ерөнхий тогоочоор ажиллаж, монголын шилдэг тогооч нарын өрсөлдсөн “Мастер тогооч” шоунд түрүүлэхэд олон хүн гайхаагүй.

Түүнийг саяхнаас бууриа сэлгэсэн сургаар таньж мэддэг, гарын хоолыг нь амтархан зооглодог гадаад, дотоодын хүмүүс хаана очсоныг нь нэг нэгнээсээ тэрүүхэндээ л эрж сураад амжсан гэдэг. Дээд зэрэглэлийн, мэргэжлийн тогооч Д.Буян “Премиум палас”-ын шинээр нээгдсэн “Haute” ресторанд ирээд байна.

-Дээд зэрэглэлийн HAUTE ресторан нээгджээ. Рестораны өөрийгөө тодорхойлсон Innovative Gourmet Cuisine гэдэг үг анхаарал татлаа. Энэ тодорхойлолтын тайлбараар ярилцлагаа эхэлье?

-Би бол gourmet /дээд зэрэглэлийн/ тогооч. Gourmet гэдэг нь гойд сайхан амттай хоол урладаг тогоочийг хэлдэг. Мэдээж цаана нь дээд зэрэглэлийн гэсэн утга агуулагддаг. Манай ресторанд хүрэлцэн ирсэн зочин зайрмаг захиаллаа гэхэд бид бэлэн бүтээгдэхүүн энд тэндээс таваглаад өгөх биш, жижиг гэлтгүй бүх зүйлийг шинэ материалаар өөрсдийн гараар урладаг. Тиймдээ ч үнийн хувьд ялгаатай. I am gourmet cook and my kitchen is refined. Энэ нь хөл бөмбөгөөр яривал дээд лиг гэсэн үг. Innovative Gourmet Cuisine гэдэг нь манай рестораны характерийг илэрхийлж байгаа юм.

-HAUTE ресторанаар үйлчлүүлээд, Ерөнхий тогоочийн хоол зооглоод гарсан хүмүүс ямар мэдлэг, мэдрэмжтэй гараасай гэж хүсч байна вэ?

-Хоолоор ходоодоо дүүргэх биш, урлаг талаас нь хараасай. Буян гэдэг хүн тухайн зочны захиалсан хоолоор юу илэрхийлээд байна, ямар амт, өнгө, үнэр, эрүүл зүйлсийг тавагласан байна. Тухайн хоолыг ямар ямар дарстай хамт идвэл тэр хоолны boom амт нь аман дотор дэлбэрэх бол гэдгийг мэдэрч хүртээсэй гэж хүсдэг.

-Та Европт, тэр дундаа чанарыг нэн тэргүүнд тавьдаг Швейцарь улсад боловсрол эзэмшиж, арав гаруй жил тогоочоор ажилласан хүн. Дээд зэрэглэлийн ресторан гэдгийн гол шалгуур нь юу вэ гэдгийг манай уншигчдад дэлгэрэнгүй ярьж өгөхгүй юу?

-Маш олон шалгууртай. Дарс, хоолны цэс, тухай рестораны атмосфер, цаашлаад үйлдвэрлэл болон үйлчилгээний мэргэжлийн ажилчин гээд олон зүйл шалгуурт хамаарна. Энэ үндсэн сууриас дахин задалж нарийвчлан шалгадаг.

-Мэргэжлийн тогооч Д.Буянгийн ажилладаг гал тогоо, хамт олонд ямар шаардлага тавигддаг вэ. Үйлчилгээний стандартыг үүнд мөн хамаатуулж ярих ёстой байх. Та ер нь ойр тойрондоо хэр өндөр шаардлага тавьж ажилладаг вэ?

-Үйлдвэрлэл болон үйлчилгээ маш сайн уялдаа холбоотой ажилладаг. Танхим эсвэл гал тогоонд асуудал гарахад хоёр баг хоёулаа бүдэрдэг. Тийм болохоор өдөр бүр 100 хувь өөрийгөө дайчилж ажиллахыг багийн хүн бүрээс шаарддаг. Ямар нэгэн алдаа гаргавал боломж олгож, өөрийгөө нээх, авьяас ур чадвараа гаргах хугацааг өгнө. Гэртээ сураагүй хүмүүжлийг ер нь ажлын байран дээрээс сурдаг шүү дээ. Мөн хөлсөө дуслуулахгүйгээр амжилтад хүрэхгүй.

-Өөрийн тань мэргэшсэн чиглэл нь сонгодог франц гал тогоо. Үүнийг тохиолдлоор сонгосон уу, эсвэл үнэхээр дурласан уу?

-Хоолыг урлаг басхүү хүний эрүүл мэндтэй шууд холбоотой гэдэг талаас нь хардаггүй байсан л даа, мэргэжлийн тогооч болохоосоо өмнө. Adelboden Steinen ресторанд дадлага хийгээд хоол гэдэг зүйл чинь урлаг болоод хөгжчихсөн юм байна гэдгийг анх 2004 онд харж билээ. Энэ нь сонирхол татаж, франц гал тогоо нь бүх гал тогооны язгуур нь гэдэг утгаар суралцья гэсэн итгэл төрж эхэлсэн. Багш маань хоёр долоо хоногийн хугацаа өгч, өөрийгөө харуулах боломж олгоод, “Чиний гарт юм байна, жаахан хичээгээд оролдоод үз” гэхэд нь би “Та надад итгэж чадвал би чаднаа” гэж хэлж байсан.

-Швейцарьт ажиллаж, амьдрах өртөг өндөр. Тэр дундаа боловсрол эзэмшинэ гэдэг бүр хэцүү байх нь ойлгомжтой. Санхүүгийн асуудлыг хэрхэн зохицуулдаг байсан бэ?

-Дээд сургуульд гурван жил сурдаг. Мэргэжил болгонд өөрийн гэсэн оюутны стандарт, цалин байдаг. Тэр системээр цалинжаад даатгал, байр, хэрэглээ, хоол хүнсээ төлөөд амьдардаг байсан.

-Сурч, ажиллаж байхад шантрах үе гарч байсан уу. Тэр үедээ өөрийгөө хэрхэн зоригжуулдаг байсан бэ?

-Зөндөө байсан. Жишээ нь, гэр маань 500 метрийн өндөрт, ажил маань 1200 метрийн өндөрт байдаг болохоор өдөр бүр 13км уулын өөд дугуйтай явдаг байсан. Өвөл бол маш хэцүү, цас их орно. Гал тогоонд өдөрт дээд тал нь 17 цаг ажиллахаас авахуулаад, за тэгээд практик ажил эхэлбэл алдаа гаргавал тэр өдөржингөө загнуулна. Fucking Hell Kitchen гэдэг чинь дээд зэрэглэлийн ресторанд буцалж байдаг юм даа (инээв.сур) Adelboden рестораны дипломыг авсан тохиолдолд дэлхийн аль ч дээд зэрэглэлийн ресторанд “ногоон гэрэл”-ээр орно. “Life fight” гэдэг үгийг өөртөө байнга хэлдэг байлаа. Тиймдээ ч сургуулиа алтан медальтай төгссөн, 800 оюутан дундаас.

-Таван жил тогоочоор сурсан. Хэрэв нууц биш бол энэ мэргэжлийг эзэмшихийн тулд хэдий хэрийн мөнгө зарцуулсан бэ?

-50-60 мянган франк зарцуулсан шүү.

-Ер нь хэзээнээс Буянгийн хоол урлалын философи гэдэг зүйл бүрэлдэж эхэлсэн гэж боддог вэ. Өөрийн тань хоол урлалын онцлог гэвэл юуг хэлэх вэ?

-2007 оноос хойш хоол зохиох, хүнсний бүтээгдэхүүний амтыг натур байдлаар нь гаргах тал дээр ажиллаж эхэлсэн. Туршаад л, хийгээд л. Надад бас тэр боломжийг гаргаж өгсөн багшдаа баярладаг юм. Дарстай зохицох бүтэн цэс зохиох гэх мэт ажлыг 2013 оноос эхэлсэн дээ.

Миний философи гэдэг нь миний хоолны урлагт хандах дотоод мэдрэмж, хүнд зохиосон хоолоо хэрхэн яаж танилцуулах вэ, бас хүний эрүүл мэндэд ямар нөлөө үзүүлэх вэ гэдэг талаас нь ихэвчлэн харж зохиосон бүтээлээр илэрнэ. Сонгодог франц дээр шинэ үеийн франц гал тогоог нэмсэн нь миний өөрийн философи болдог байгаа.

-Би хувьдаа тогооч хүнийг урдуураа гарсныг ундалж, хойгуураа гарсныг хооллож явдаг буян хураасан мэргэжил гэж боддог. Таны мэргэжлийн хамгийн сайхан нь юу вэ?

-Тогооч гэдэг мэргэжил маань урлаг тал руугаа их хөгжсөн. Би хоолоор хүний эрүүл байлгах эмчлэх талаар сурснаараа хамгийн сайхан нь гэж боддог. Дарс нь хоолтой зохицсон тохиолдолд ямар гоё мэдрэмж, амт, үнэр бий болдог гээч.

Оюутан байхдаа би өөрийгөө маш сайн цэвэрлэгч гэж боддог байсан. Гал тогооны 70 хувь нь цэвэрлэгээ. Ямар төмрийг ямар бодисоор угаах вэ гэдгээ маш сайн мэддэг болсон. Хоёр дахь буюу хамгийн гол мэргэжил маань тогооч. Мөн би өөрийгөө эмч гэж боддог. Би муухан эмчээс дээр. Ямар бүтээгдэхүүнд ямар бодис агуулагддаг, тэр нь хүний биеийн аль хэсэгт очоод, хэрхэн боловсрогдож, ямар үйлчлэл үзүүлдэг вэ гэдгийг сайн мэднэ. Буруу хооллолтоос өвчин хэрхэн үүсдэгийг мэднэ. Дөрөв дэх мэргэжил маань төмөр. Гал тогоон дахь бүх тоног төхөөрөмж, сав суулга хүний биед ямар үйлчлэл үзүүлэх вэ гэдгийг мэднэ. Тав дахь нь би багш. Би багшилж байсан. Нэг мэргэжил эзэмшихдээ тавыг эзэмшсэн. Энэ л миний мэргэжлийн хамгийн сайхан нь биш гэж үү.

-Ярилцсанд баярлалаа.

Д.Төв