Хилийн шалган нэвтрүүлэх автомат хаалганы ачаар хилээр гарахдаа дөрөв дахин хурдан гарах боломжтой болсон талаар бид өмнө нь мэдээлсэн. Өөрөөр хэлбэл Монгол Улсын иргэд гадаад паспортоо бүртгүүлээд хугацааг нь дуусах хүртэл шалгагч дээр очихгүйгээр автомат хаалгаар үйлчлүүлэх юм.

Монгол Улсын хилээр нэвтрэгсдийн бүртгэл хяналтын үйл ажиллагаанд орчин үеийн өндөр хурдтай техник, технологийг нэвтрүүлэн, хувь хүний биометрик мэдээлэл агуулсан мэдээллийн санг ашиглан хилийн шалган нэвтрүүлэх хяналтыг шуурхай болгож байгаа юм.

Цахим гарцаар саадгүй, шуурхай нэвтрэхийн тулд урьдчилсан бүртгэл хийлгэх шаардлагатай бөгөөд гадаад паспорт дээрээ наалт буюу цахим гарцаар нэвтрэх зөвшөөрөл олгосон талаарх тэмдэглэгээг хийлгэх юм. Ингэснээр цахим гарцаар 5-15 секундын хугацаанд шалгагчгүйгээр шуурхай нэвтрэх нөхцөл бүрдэж буй юм.

Бүртгэлийг өдөр бүр а08.00- 17.00 цагийн хооронд дор дурьдсан газруудад хийнэ. Үүнд:

1.“Чингис хаан” олон улсын нисэх буудал, Явагчийн танхимын №2 кабин
2.Дүнжингарав худалдааны төв дэх “Нийслэлийн үйлчилгээний нэгдсэн төв”-ийн №26 дугаар цонх.

Бүртгүүлэхдээ

• Анкет /Бүртгэлийн ажилтнаас авах/
• Гадаад паспорт /хүчинтэй хугацаа 6 сараас доошгүй байх/-той ирэх шаардлагатай бөгөөд баруун, зүүн гарын долоовор хурууны хээ, зургаа авахуулах юм байна.

Цахим гарцаар нэвтрэх зөвшөөрлийг зорчигчийн баримт бичиг, визийн хүчинтэй хугацаагаар олгоно.