Маргааш та Замын цагдаагийн газарт хандаж гомдол санал өгөх, санал хүсэлтээ 10-17 цагийн хооронд илэрхийлэх боломжтой. Энэ өдөр Замын цагдаагийн газар дээр Мэргэжлийн хяналт, Техник бүртгэл, Замын зохион байгуулалт, Шуурхай алба, Олон нийтийн харилцаа, Хэрэг бүртгэлт, Мөрдөн байцаалтын чиглэлээр хэлтэс, тасаг, алба бүрээс төлөөлөгч сууж иргэдтэй уулзах гэнэ. Мөн та заавал өөрийн биеэр очилгүйгээр Авто радио 96,3 FM радиогоор Замын цагдаагийн ажилтнуудтай холбогдож санал хүсэлтээ илэрхийлж болох юм.

2008 он гарсаар нийслэлд 1022 осол хэргийн тохиолдол бүртгэгдэж, 12 хүн нас барж, 422 хүн хүнд хөнгөнөөр гэмтсэн байна. Олон улсад, манай улс зам тээврийн ослын улмаас нас баралтаараа эхний 16-д багтдаг байна. Энэ нь тээврийн хэрэгсэлд ногдох нас баралт 7 дахин их байгааг харуулж байгаа үзүүлэлт юм.

Зам тээврийн осол үйлдэгдэхэд автомашины насжилт ихээхэн нөлөөлдөг гэнэ. Улсын хэмжээнд үзлэг тооллогод хамрагдсан нийт автомашины 50,4 хувь нь 11 жилээс дээш хугацаагаар ашиглагдсан байдаг ажээ. Мөн одоогийн ажиллаж байгаа гэрлэн дохионууд байнга эвдэрсэнээс уулзвар нэвтрэн өнгөрөх тээврийн хэрэгслүүд мөргөлдөх, шүргэлцэх осол их хэмжээгээр гардаг байна. Мэдээж явган зорчигчийн анхаарал болгоомжгүй, гарцаар гардаггүй, гэрлэн дохиог анзаардаггүй зэрэг үйлдлүүд нь осол аваар гарах үндсэн нөхцлүүдийн нэг болдог.

Харин тэрхүү осол аваарыг шийдвэрлэхэд Замын цагдаагийн газарт хэн илүү танилтай нь өөрийн талд асуудлыг шийдэж чаддаг хэмээн сэтгүүлчид шүүмжлэлтэй ханддаг. Харин энэ тал дээр Замын цагдаагийн газрын мэргэжилтнүүд хэлэхдээ “Танил тал харах явдал байдаг нь үнэн. Гэвч эцсийн дүнд асуудлыг хууль журмын дагуу л шийдвэрлэдэг” гэж байлаа. Мөн Замын цагдаагийн газраас торгуулийн хэмжээ нь дүрэм зөрчсөн жолоочид нөлөөлөхөө больсон тул торгуулийн хэмжээг нэмэгдүүлэх нь зүйтэй гэсэн байр суурьтай байна.

М.Жаргал