Гадаад харилцааны сайд Ц.Мөнх-Оргил болон газрын дарга нар “Мэдээллийн цаг”-т оролцлоо. 2016-2020 оны Засгийн газрын үйл ажиллагааны мөрийн хөтөлбөрт Гадаад харилцааны чиглэлээр нийт 13 асуудал тусгагджээ. Үүнтэй холбогдуулан Засгийн газар, УИХ-аас Гадаад харилцааны яаманд хэд хэдэн үүрэг даалгаврыг өгсөн талаар Ц.Мөнх-Оргил сайд ярилаа.

Нэгдүгээрт, Монгол Улс дэлхийн 186 улстай дипломат харилцаатай. Улс төр, соёл, хүмүүнлэгийн сайн харилцаагаа хөгжүүлэн эдийн засаг, худалдааны эргэлтээ нэмэгдүүлэхэд чиглүүлэх үүрэг өгсөн байна. Монголын аж ахуйн нэгж, бизнес эрхлэгчдэд түнш олж өгөх, худалдааны гэрээг нь хөнгөлж өгөх, хөрөнгө оруулалтыг нэмэгдүүлэхэд бололцоотой ямар арга зам байгааг илэрхийлэх зэрэг үүрэг даалгаврыг дипломат төлөөлөгчийн газар ажиллаж байгаа бүх хүмүүст өгчээ. Ажлыг үүгээр нь дүгнэх юм байна.

Хоёрдугаарт, Гадаадад Монгол Улсаа сурталчлах. Монголын давтагдашгүй соёлын өвийг соёлын элч төлөөлөгчдөөрөө дамжуулж, улсаа сурталчлах асуудалд онцгой анхаарна.

Гуравдугаарт, Гадаадад ажиллаж, амьдарч байгаа 130 гаруй мянган Монгол иргэдийн эрх ашгийг хэрхэн хамгаалах вэ гэдэгт анхаарлаа хандуулна.

“Дээрх асуудлуудыг тусгасан Засгийн газрын мөрийн хөтөлбөрийг хэрэгжүүлэх арга хэмжээний төлөвлөгөө гэж гарна. Үүний дагуу бид ажлаа зохион байгуулна. Мөн хоёр их хөрштэйгөө иж бүрэн түншлэлийнхээ харилцааг хөгжүүлэх, найрсаг харилцаагаа бүх салбарт хөгжүүлэхэд онцгой анхаарна. Монгол Улсад хөрөнгө оруулагчдын итгэлийг сэргээх асуудал дээр мөн онцгой анхаарна” хэмээн Гадаад харилцааны сайд Ц.Мөнх-Оргил хэллээ.

Сүүлийн жилүүдэд гадаадын хөрөнгө оруулалт эрс буурсан. Монгол, Канадын Засгийн газар хоорондын хөрөнгө оруулалт харилцан хамгаалах хэлэлцээ олон жил хүлээлттэй байсан бол сая Канадын парламентын нийтийн танхимын даргын айлчлалын үеэр хэлэлцээнд гарын үсэг зуржээ.

"Хөрөнгө оруулагчдыг татахын тулд татварын хөнгөлөлт хийх биш. Харин улс төр, Засгийн газар, бодлого нь тогтвортой байх нь хөрөнгө оруулагчдад маш чухал учир энэ дээр анхаарч ажиллана" хэмээн Гадаад худалдаа, эдийн засаг хамтын ажиллагааны захирал В.Энхболд хэллээ.

Гэрэл зургийг Г.Өнөболд