Японд дефляци үргэлжилж байна, Хятадын хэрэглээний үнийн индекс буурч, дефляцид өртөж байна гэх мэдээллийг бид уншдаг байв. Тэгвэл манай улсын сүүлийн 26 жилийн түүхэнд анх удаа хэрэглээний үнийн индекс буурлаа. 1990 онд манай улс чөлөөт зах зээлийн системд шилжсэнээс хойшхи анх удаа дефляцийн шинж тэмдэг илэрч байна.

Үндэсний статтистикийн хороо ээлжит хэвлэлийн хурлаа хийв. Тэд хэрэглээний бараа, үйлчилгээний үнэ 2016 оны наймдугаар сард өмнөх оны мөн үеийнхээс 0.2 хувиар буурсныг мэдээллээ. Үүнд хүнсний бараа (тэр дундаа мах), ундаа, усны бүлгийн үнэ дүнгээрээ 3.5 хувиар буурсан нь голлон нөлөөлжээ.

Дефляци гэж юу вэ?

Бараа, үйлчилгээ худалдан авах хүмүүсийн эрэлт, хэрэгцээ буурснаар үйлдвэрлэгчид бүтээгдэхүүнээ хямд үнээр борлуулж алдагдал хүлээхэд хүргэдэг. Иймд дефляци сөрөг талтай. Үнэ буурах нь нэг талаас иргэдэд ээлтэй мэт боловч удаан үргэлжилбэл дотоодын үйлдвэрлэгчид, цаашлаад нийт эдийн засагт халтай. 

Тэгвэл наймдугаар сарын байдлаар улсын инфляцийн түвшин -0.2 хувь, нийслэлийнх -0.6 байна. Харин өнгөрсөн онд инфляц 3.4, 2014 онд 7.7 хувь байв. Энэ оны тавдугаар сараас хойш инфляц тогтмол буурчээ. 

Саяхныг болтол бид инфляциас үхтлээ айн, инфляцийн өсөлтөд ихээхэн анхаардаг байв. Мөнгөний худалдан авах чадварыг бууруулдаг тул цалин тэтгэвэр өслөө ч мөнгөний үнэ цэнэ буурдаг тул инфляциас эмээдэг байлаа.

Өнгөрсөн оноос эхлэн инфляци тогтворжсон ч ам.долларын ханш чангарч, ханшийн зөрүүнээс үүдэн ихээхэн алдагдал хүлээв. Гэтэл одоо дефляци гэх эдийн засгийн дараагийн шүдний өвчний шинж тэмдэг илэрч эхэллээ.