Дөнгөж сая Шангрила Моллд байрлах IMAX-д “Одод болохын хүслэн” инээдмийн уран сайхны кино нээлтээ хийлээ.  Дэлхий даяар 1100 гаруй театртай IMAX Монголд өнгөрсөн долдугаар сард албан ёсны нээлтээ хийж байсан билээ. 

Мөрөөдлийн театр, Монгол Контент ХХК-ийн хамтарсан уг бүтээл тус кинотеатрт нээлтээ хийж буй анхны кино болж байгаа юм.

Урлаг соёл, спортынхны төлөөлөл, кино уран бүтээлчид Одод болохын хүслэн уран сайхны киноны анхны үзэгчид болсон бөгөөд улаан дарсаар дайлуулж, Uvertura хамтлагийн дуунд омогшиж, Улаан туг хамтлагийн дурсамж сэргээсэн бүжгийн хэмнэлийг мэдрэв. 

Дуулж, бүжиглэх сонирхолтой хүүхэд залуус нэгэн зүгт хараа хандуулж, зорилгоо чиглүүлэн нэгнийхээ гэрт, орцонд, гадаа хүртэл бэлдэн байж ордог байсан Одод болохын хүслэн тэмцээний нэрээр нэрлэсэн уран бүтээл цаг хугацаа хичнээн өнгөрсөн ч зүрх сэтгэлд үлдсэн тэр зорилгынхоо төлөө зүтгэж буй залуусын тухай өгүүлнэ.

Гол дүрүүдэд "Мөрөөдлийн театр"-ын Батаа, Шагай, Эрхэмээ гурав тоглосон бөгөөд  тэд дахин нэгдэж, шив шинэ стиль имижтэйгээр фэнүүдтэйгээ уулзах болно.  Түүнчлэн жүжигчин Ш.Алтанцэцэг, Д.Хүрэлхүү, А.Даваахүү, Ц.Нарантунгалаг, О.Үржинханд нар хамтран тогложээ.

“Мөрөөдлийн театр”, “Монгол Контент” ХХК-ийн хамтын бүтээл тус киноны найруулагчаар “Содура” уран сайхны киноны найруулагч Б.Жаргалсайхан ажиллажээ.  Мөн кино зохиолыг "Аав" киноны зохиолч М.Энхдалай бичсэн байна. 

Улаанбаатар чуулгын тайзнаа авьяас чадвараа сорин, үеийн нөхдөдөө урам зориг бэлэглэн байсан олон хүний хүүхэд насны гэгээн дурсамжийг сэргээх одод болохын хүслэн киноны Тэнгис кино театр дахь нээлт өнөөдөр орой 18.30 цаг болно.