Олон улсын шатрын холбоо Азербайжан улсын Баку хотноо есдүгээр сарын 1-14-нд явагдах дэлхийн шатрын 42 дугаар олимпиадад ажиллах шүүгчдийн нэрсийг зарлалаа.

Энэ удаагийн олимпиадад Монгол Улсаа төлөөлөн Олон улсын шатрын холбооны гүйцэтгэх зөвлөлийн гишүүн, ОУШХ-ны шатрыг сургуулиудад дэлгэрүүлэх комиссын нарийн бичгийн дарга, Монголын Шатрын Холбооны ерөнхийлөгч, Олон улсын шүүгч /IA/, Олон улсын шатрын холбооны зөвлөх дасгалжуулагч /FST/ Ц.Сайнбаяр ажиллахаар болсон байна.

Мөн Дэлхийн шатрын олимпиадын үеэр хуралдах Олон улсын шатрын холбооны 87 дугаар их чуулганд Монголын шатрын холбооны ерөнхийлөгч Ц.Сайнбаярт Олон улсын зохион байгуулагч цол олгуулахаар Монголын Шатрын Холбооны Гүйцэтгэх захирал Ц.Цогбаяр тодорхойлолтыг илгээлээ.

Өмнө нь Олон улсын зохион байгуулагч цолыг олон улсын шүүгч, олон улсын шатрын холбооны мастер Г.Алтан-Оч хүртэж байсан юм.

Эрэгтэй багийн ахлагчаар Монгол улсын гавъяат дасгалжуулагч, Олон улсын дасгалжуулагч П.Жигжидсүрэн, эмэгтэй багийн ахлагчаар Олон улсын дасгалжуулагч Г.Оюунчимэг, шүүгчээр Олон улсын шүүгч Ц.Сайнбаяр ажиллаж байна.

Дэлхийн Шатрын Холбооны дээд чуулганд Монголын Шатрын Холбооны гүйцэтгэх захирал Ц.Цогбаяр оролцоно.