Рио 2016 Зуны олимпын XXXI, паралимпын XV наадамд оролцох Монголын баг тамирчид, дасгалжуулагчдаа үдэх ёслол яг одоо Чингисийн талбайд эхэлж байна.

Өнөөдөр баг тамирчдадаа олимпын наадамд өмсөх ёслолын хувцас, мөнгөн хандив болон төрийн далбааг гардуулан өгнө. Мөн тамирчдын төлөөлөл, жүдо бөхийн тамирчин Д.Сумъяа, боксын тамирчин Д.Отгондалай нар тангараг өргөх юм.

Гэрэл зургийг Д.Жавхлантөгс

Монгол Улсын Ерөнхийлөгч Цахиагийн Элбэгдорж Монголын баг тамирчдыг үдэх ёслолд хүрэлцэн ирснээр ёслолын ажиллагаа албан ёсоор эхэллээ.

Ёслолын ажиллагаанд Монгол Улсын Ерөнхийлөгч, Ерөнхий сайд, УИХ-ын болон Засгийн газрын  гишүүд болон Монголын Үндэсний Олимпын хороо, ЭМСЯ, Олимпын хөгжлийг дэмжих сан болон шигшээ багийн тамирчид, олимпын медальтнууд оролцож байна.

Наймдугаар сарын 5-наас эхлэх РИО 2016 зуны олимпын наадамд спортын есөн төрөлд 42 тамирчин Монгол Улсаа төлөөлөлөн оролцох юм.

Ерөнхий сайд, Олимпын наадамд бэлтгэх ажлын хэсгийн дарга Ж.Эрдэнэбат Рио 2016-д мордож буй баг, тамирчдад хандан үг хэлж байна.

Тэрбээр, нийт баг тамирчдад амжилт хүсэхийн ялдамд, өмнөх амжилтуудаа улам бататгахыг хүслээ.

Монголын баг, тамирчид Төрийн дуулалаа дуулж, хүндэтгэл үзүүллээ.

Монгол Улсын Ерөнхийлөгч Ц.Элбэгдорж Монголын баг, тамирчдад хандан өөрийн захиасыг хэлэв. Хувийн зохион байгуулалт, сахилга батаар бусдаар ялгарах нь баг, тамирчдад хамгийн чухал гэдгийг онцолсон юм. Мөн тэрбээр эх орон, ард түмэн тамирчдаа харж байгааг хэлээд амжилт бүхний дээдийг хүслээ.

Тамирчдын төлөөлөл жүдо бөхийн тамирчин Д.Сумъяа, боксын тамирчин Д.Отгондалай нар тангараг өргөв.

Харин одоо Сахагийн Олон улсын хүүхдийн спортын наадамд амжилттай оролцоод ирсэн тамирчдад шагнал гардуулж байна. Олон улсын хүүхдийн наадмаас манай улсын тамирчид нийт 48 медальтай ганзага дүүрэн ирсэн билээ.

Монголын шигшээ баг Сахагийн наадмаас 14 алт, 9 мөнгө, 25 хүрэл медальтай ирсэн. Эдгээр хүүхэд Рио 2016 Зуны олимпын XXXI, паралимпын XV наадамд оролцох Монголын баг тамирчдад мэндчилгээ дэвшүүлж байна.

Мөн 14 удаа Сахагийн тэнгэрт мандсан төрийн далбааг Эрүүл мэнд, спортын сайд С.Ламбаад гардуулан өглөө. 

Ерөнхийлөгч Ц.Элбэгдорж төрийн далбааг Монголын багийн ахлагч Ж.Хатанбаатарт гардуулан өглөө. Харин багийн ахлагч Ж.Хатанбаатар тугийг Монголын тугч Баттулгын Тэмүүлэнд гардуулсан юм.