ШУА-ийн Хими, химийн технологийн хүрээлэн “Байгалийн түүхий эдийн химийн судалгаа болон боловсруулалт” олон улсын хурлыг маргааш зохион байгуулна.

Дөрөв дэх удаа болж буй хурал “Blue sky” зочид буудалд эхэлнэ. Уг хуралд ургамал, биологийн болон эрдэс түүхий эдийн онцлог, химийн судалгааны талаар 40 гаруй аман илтгэл, 50 гаруй ханан илтгэл хэлэлцүүлнэ.

Хуралд гадаадын зургаан орны (АНУ, ХБНГУ, БНСУ, БНХАУ, ОХУ, Япон) 40 гаруй, Монголын их, дээд сургууль, эрдэм шинжилгээний байгууллагын 150 гаруй эрдэмтэн, судлаач хамрагдана. БНСУ-ын Шинжлэх ухаан технологийн хүрээлэнгийн (KIST) дэд ерөнхийлөгч доктор Тае Хүн Лим, БНСУ-ын Цахиуран хагас дамжуулагчийн хүрээлэнгийн захирал доктор Жүнён Чан, ХБНГУ-ын Дрездений техникийн их сургуулийн Органик химийн салбарын эрхлэгч профессор Кноелкер, БНХАУ-ын Ченгдугийн Биологийн хүрээлэнгийн орлогч захирал Гуолин Жан зэрэг салбартаа нэр хүндтэй гадаадын эрдэмтэн судлаачид урилгаар илтгэл тавина.

Монгол орны биологийн болон эрдсийн гаралтай түүхий эдийн судалгаа нь манай улсын шинжлэх ухаан технологийн хөгжлийн бодлогод чухал байр эзэлдэг. ШУА-ийн Хими, химийн технологийн хүрээлэнгийн зохион байгуулдаг энэ хурал энэ чиглэлээр манай улсад хийж буй судалгааны ажлыг тоймлон багтааж чаддагаараа манай судлаачдын харилцан бие биенээсээ суралцах, шинэ мэдээлэл олж авах боломжийг хангадаг.

Энэ хурал Монгол орны төдийгүй гадаадын өндөр хөгжилтэй улсуудад хийгдэж буй судалгааны ажлын шинэлэг үр дүнг харилцан танилцуулах, цаашдын хамтын ажиллагааны суурийг тавихад чухал ач холбогдолтой юм.