Энэ удаагийн УИХ-ын Сонгуулийн тухай хууль олон зүйлд өөрчлөлт авчирсны нэг нь эмэгтэйчүүдийн квот билээ. Тодруулбал Сон­гуулийн тухай хуульд өөрчлөлт оруулахдаа эмэгтэйчүүдийн квот 30 байсныг 20 хүртэл хувь болгож бууруулсан юм. 

Үүнд УИХ-ын одоогийн гишүүд дургүйцлээ илэрхийлсэн ч тус болоогүй. Тэгвэл энэ удаад УИХ-д нэр дэвшигч, хоёр гол намын  ЭМЭГТЭЙЧҮҮДИЙГ танилцуулъя.

МАН-ын нэр дэвшигчид

МАН-аас яруу найрагч Г.Мөнхцэцэг УИХ-д сонгуульд Дорноговь, Говьсүмбэр аймгийн 12-р тойрогт нэр дэвшиж байна. Харин түүний өрсөлдөгч АН-ын Г.Ганбаатар. 

Олон нийтэд төдийлөн танил болоогүй, МАН-ын нэр дэвшигчийн нэг нь С.Оюунбилэг. Тэрээр Хан-Уул дүүрэгт АН-ын томоохон удирдагчдын нэг, туршлагатай улстөрч Л.Болдтой өрсөлдөнө.

БСШУ-ны дэд сайдаар ажилласан Д.Атармаа МАН-аас өрсөлдөж буй 16 эмэгтэйн нэг. Тэрээр Орхон аймагт УИХ-ын гишүүн асан, Эгийн голын УЦС-ын төслийн захирал Д.Одхүүтэй өрсөлдөнө.

Сэлэнгэ аймгийн 25-р тойрогт МАН-аас Н.Оюундарь нэр дэвшихээр боллоо. Түүнийг хүмүүс “Blue mon”-ын Н.Оюундарь гэдгээр нь илүүтэй мэднэ. Харин түүний өрсөлдөгч АН-ын С.Баярцогт. 

Үндэсний цэцэрлэгт хүрээлэнгийн захирал байсан Б.Саранчимэг МАН-аас БЗД-ийн 51-р тойрогт нэр дэвшихээр боллоо. Харин түүний өрсөлдөгч АН-аас УИХ-д нэр дэвшигч Р.Булгамаа. Тэрээр хэдхэн хоногийн өмнө ИЗНН-аас АН-д шилжин ирсэн юм. 

Д.Оюунхорол БЗД-ийн 49-р тойрогт МАН-аас нэр дэвшинэ. Энэ тойрогт тэрээр АН-ын М.Зоригттой учраа таарч байна. 

П.Анужин МАН-аас нэр дэвшиж байна. Монгол Тулгатны зуун эрхэм нэвтрүүлгийн хөтлөгчөөр олонд танигдсан бүсгүй БЗД-ийн 54-р тойрогт АН-аас нэр дэвшигч Д.Арвинтай өрсөлдөнө.

Сүхбаатар, Багануур дүүргийн 62-р тойрогт МАН-аас Ц.Цогзолмаа нэр дэвшиж байгаа бөгөөд түүний өрсөлдөгч нь АН-ын Л.Гантөмөр. 

Бишрэлт группын Ерөнхийлөгч Б.Ундармаа энэ удаагийн сонгуульд Сонгинохайрхан дүүргээс дахин өрсөлдөнө. Түүний өрсөлдөгч АН-ын гишүүн, ХХАА-н сайд асан Ш.Түвдэндорж.

ММ агентлагийн сэтгүүлч, захирал асан М.Оюунчимэг Чингэлтэй дүүрэгт АН-ын Хөдөлмөрийн сайд Г.Баярсайхантай өрсөлдөнө. Энэ тойргоос УИХ-ын гишүүн Г.Уянга гарсан бөгөөд тэрээр аль тойргоос өрсөлдөх нь тодорхойгүй байна.  

УИХ-ын гишүүн, ТВ5 телевизийн захирал Д.Сарангэрэл дахин УИХ-ын гишүүн болохоор зэхэж байна. Тэрээр Хан-Уул дүүргийн засаг даргатай энэ дүүрэгт өрсөлдөнө. 

Монполимет группын Ерөнхийлөгч Ц.Гарамжав уул уурхай, үйлдвэрлэлийн салбарыг төлөөлөн Сонгинохайрхан дүүргээс УИХ-ын гишүүн болохоор зорьж байна.

АН-аас нэр дэвшигч эмэгтэйчүүд

Завхан аймаг 18-р тойрогт АН-ын З.Нарантуяа нэр нэр дэвшиж байгаа бөгөөд тэрээр МАН-ын Ш.Батсамбуу учраа таарах нь ээ.

Энэ удаагийн УИХ-ын сонгуульд хэд хэдэн урлагийнхан нэр дэвшиж буй. Тэдний нэг нь дуучин Г.Эрдэнэтунгалаг АН-аас Сэлэнгийн 26-р тойрогт нэр дэвшжээ. Энэ бол ёстой битүү морь гэдэг шиг хэн ч урьдчилан таамаглаагүй нэр дэвшигч байлаа. Тэрээр МАН-ын Ж.Эрдэнэбаттай өрсөлдөнө.

АН-аас нэр дэвшигч Б.Энхбайгаль Төв аймгийн 28-р тойрогт МАН-ын М.Энхболдтой өрсөлдөхөөр болжээ. 

Хөвсгөл аймгийн 38-р тойрогт АН-аас УИХ-ын гишүүн Ц.Оюунгэрэл нэр дэвшиж байгаа бөгөөд түүний өрсөлдөгч МАН-ын Ц.Даваасүрэн. 

АН-аас УИХ-д нэр дэвшигч Р.Бурмаа Дархан-Уул аймгийн 45-р тойрогт өрсөлдөнө. Харин тэрээр МАН-ын Д.Хаянхярваатай нүүр тулах нь ээ.  

Г.Байгалмаа АН-аас Хан-Уул, Багахангай дүүргийн 56-р тойрогт нэнр дэвшихээр болсон. Тэрээр энэ тойрогт МАН-ын Ц.Нямдоржтой өрсөлдөх юм. 

УИХ-ын гишүүн М.Батчимэг энэ удаагийн сонгуульд Сүхбаатар, Багануур дүүргийн 61-р тойрогт нэр дэвшинэ. Харин тэрээр Сү.Батболдтой учраа таарч байна. 

УИХ-ын гишүүн С.Одонтуяа АН-аас БГД-ийн 67-р тойрогт нэр дэвших бөгөөд энэ тойрогт МАН-аас Ч.Ундраа мөн өрсөлдөж байгаа юм. 

Сонгинохайрхан дүүргийн 72-р тойрогт АН-аас нэр дэвшигч Л.Эрдэнэчимэг Тимон нэрээрээ хүүхэд залуусын дунд танил болсон Н.Учралтай учраа таарчээ. 

АН-аас УИХ-д нэр дэвшиж буй бас нэгэн эмэгтэй Б.Ургамалцэцэг. Тэрээр СХД-ийн 74 тойрогт МАН-ын Д.Тэрбишдагватай өрсөлдөнө. 

Баянгол дүүргийн засаг дарга асан Энх-Амгалан энэ дүүргээс нэр дэвшин, одоогийн УИХ-ын гишүүн С.Эрдэнэтэй өрсөлдөнө.

Баянгол дүүрэгт МАН-ын бас нэг эмэгтэй нэр дэвшигч байгаа нь Америкт Төгсөгчдийн Холбооны Ерөнхийлөгч, доктор А.Ундраа. 

Сонгогчдын гайхашралг төрүүлсэн нэр дэвшигчдийн нэг нь дархан аварга, Хөдөлмөрийн баатар Х.Баянмөнхийн охин Б.Сүрэнжав. Тэрээр Увс аймагт МАН-ын гишүүн, УИХ-ын гишүүн Ч.Хүрэлбаатартай өрсөлдөхөөр болжээ. 

УИХ-д нэр дэвшинэ гэдгээ хамгийн түрүүнд зарласан дуучин М.Нарантуяа Баянгол дүүргээс нэр дэвшинэ гэсэн ч чухам аль тойргоос гэдэг нь тодорхойгүй байна. АН болон МАН-ын дээрх эмэгтэй гишүүд дээр бие даагчдын нэрс энэ долоо хоногт багтан тодорхой болох юм. Мөн одоогийн УИХ-ын гишүүн Г.Уянга, З.Баянсэлэнгэ, С.Оюун нар сонгуульд өрсөлдөнө.

Одоогийн УИХ-д 11 эмэгтэй гишүүн бий. Дараагийн сонгуульд хэдэн эмэгтэй гишүүн ажиллахыг сонгогч олон шийднэ. Ингэхдээ одооогийн түвшнээс бууруулахгүй байх нь чухал.