“Centerra Gold” компани Нийслэл дэх Захиргааны хэргийн анхан шатны шүүх ямар үндэслэлээр компанийн Гацууртын орд дахь ашиглалтын тусгай зөвшөөрлийг түр түдгэлзүүлснийг ойлгохгүй байна гэж мэдэгдлээ.

Мөн Гацууртын ордод хамаарах тусгай зөвшөөрлүүдийг нь түр түдгэлзүүлсэн нь түр хугацааны асуудал гэж тус компани "Bloomberg"-т мэдээлсэн байна. Харин Нийслэлийн захиргааны хэргийн анхан шатны шүүх компанид шийдвэрээ хүргүүлээгүй гэжээ. Одоогоор тус компани нэмэлт мэдээлэл цуглуулахаар ажиллаж байгаа юм байна.

Нийслэл дэх Захиргааны хэргийн анхан шатны шүүх өнгөрсөн пүрэв гарагт тусгай зөвшөөрлийг түдгэлзүүлэх шийдвэр гаргасан юм. Шүүх хуралд нэхэмжлэгчээр "Ноён уулаа аваръя" хөдөлгөөн, хариуцагчаар Ашигт Малтмалын газар, харин “Centerra Gold Mongolia” компани гуравдагч этгээдээр оролцсон.

Шүүх шийдвэрээ долоо хоногийн дараа буюу энэ пүрэв гарагт Ашигт Малтмалын газарт хүргүүлнэ гэж мэдэгдээд байна. Энэ үед “Centerra Gold” компанийн зүгээс дэлгэрэнгүй мэдээлэл гарч магадгүй. Харин Ашигт Малтмалын газар шүүхийн шийдвэрийг давж заалдана гэж мэдэгдээд байгаа юм.

Д.Хаш-эрдэнэ