“Соёлын биет бус өвийн хадгалалт, хамгаалалтын төлөвлөгөө” сэдэвт, таван өдрийн үндэсний сургалтыг зохион байгуулна.

Япон Улсын “Итгэлцлийн сан”-гийн дэмжлэгээр Боловсрол, соёл, шинжлэх ухааны яам, Соёлын өвийн төв, ЮНЕСКО-гийн Монголын үндэсний комисс, ЮНЕСКО-гийн Бээжин дэх Төлөөлөгчийн газар хамтран энэ сарын 23-27-нд Олон улсын хүүхдийн “Найрамдал” төвд дээрх сургалтыг явуулах юм.

ЮНЕСКО-гийн Соёлын биет бус өвийг хамгаалах тухай Конвенцийн \2003 он\ хүрээнд Монгол Улсын Соёлын биет бус өвийг хадгалж, хамгаалах бодлого, төлөвлөгөөг боловсруулахад холбогдох Төрийн болон төрийн бус байгууллагуудын ажилтнууд, өвлөн уламжлагчдын чадавхийг бэхжүүлэх нь сургалтын зорилго юм. Сургалтад 21 аймгийн соёлын мэргэжилтэн, өвлөн уламжлагчид, холбогдох төрийн болон төрийн бус байгууллагуудын төлөөлөгчид хамрагдах аж.

ЮНЕСКО-гийн, итгэмжлэгдсэн, олон улсын зөвлөх багш нар СББӨ-ийн хадгалалт, хамгаалалтын төлөвлөгөө боловсруулах арга зүй, онол практикийн чиглэлээр шинээр боловсруулсан сургалтын хөтөлбөрийн дагуу олон улсын түвшинд анх удаа Монгол Улсад удирдан явуулна.

Оролцогчид сургалтаар олж авсан мэдлэгийнхээ хүрээнд ЮНЕСКО-гийн шинжээчдийн тусгайлан сонгосон Цагаан сар, хүүхдэд нэр өгөх, угаалгын зан үйл, уламжлалт нум сум урлах арга ухаан зэрэг Монголын соёлын биет бус зүйлийг хадгалж, хамгаалах төлөвлөгөө боловсруулах юм.