Цагдаагийн байгууллагын түүхт 95 жилийн ойг угтан зохион байгуулах ажлын  хүрээнд Цогтцэций сумын Цагдаагийн хэлтсээс улсын хэмжээнд зохон байгуулагдсан "Амар тайван амьдралын төлөө хамтдаа" нээлттэй хаалганы өдөрлөгийг сумандаа 2016 оны тавдугаар сарын 13-ний өдөр зохион байгуулж, ЗЦХ-ээс “Ногоон гэрэл-Цагаан шугам-2016” тэмцээний төлөвлөгөө удирдамжийн хэрэгжилтийг тооцон, тэмцээн зохион байгуулан ажиллажээ.
 
Цогтцэций сумын “Мөрөөдөл” цогцолбор 6-р сургууль болон Т.Борын нэрэмжит ЕББД сургуулийн сурагчид гэрийн даалгавар, мэндчилгээ уриалга, багийн ахлагч нарын тэмцээн, буухиа тэмцээн, урлагийн тоглолт гэсэн нийт дөрвөн үе шаттай тэмцээнд оролцсон байна.

 
Баг бүрт удирдамжийн дагуу 10-12 хүүхэд хамрагдаж, өгөгдсөн даалгавар, замын хөдөлгөөний дүрэм, мэдлэг олгох сорилтуудыг хийж гүйцэтгэн, Цогтцэций сумын ГХУСАЗСЗ, “Энэрэхүйн ухаан” өрхийн эмнэлгийн төлөөлөл, ЗЦХ-ийн дарга, хэсгийн төлөөлөгч нарын шүүгчдийн бүрэлдэхүүн шүүж шалгаруулжээ.
 
Тэргүүн байранд “Мөрөөдөл” цогцолбор 6-р сургуулийн “Шонхор” баг 14,3 оноогоор, дэд байранд Т.Борын нэрэмжит ЕББД сургууль “Зоригт” баг 13,1 оноогоор тус тус шалгарч, медаль, өргөмжлөл, гарын бэлэг хүртсэн аж.

 
Түүнчлэн Цогтцэций сумын Цагдаагийн хэлтэс дөрөвдүгээр сарын 9-14-ний өдрүүдэд “Хүүхдийг зам тээврийн осол хэргээс урьдчилан сэргийлэх өдөр”-т сургуулийн хүүхдүүдийн дунд зохион байгуулсан “Замын хөдөлгөөний аюулгүй байдал” сэдэвт гар зургийн уралдаанд шалгарсан бүтээлүүд, 1-5 дугаар ангийн хүүхдүүдийн эцэг эхчүүдэд хандсан “Хүүхдийг зам тээврийн осол хэргээс урьдчилан сэргийлэх” сэдэвт захидлуудыг олон нийтэд хүргэсэн байна.