Монгол Улс энэ оны эхний дөрвөн сарын байдлаар 1000 орчим тонн мах экспортлоод байна. Ингэхдээ голчлон адууны мах экспортод гаргасан талаар Хүнс, Хөдөө Аж Ахуйн яамнаас мэдээллээ.

Энэ хавар Монгол Улс анх удаа салаа туурайтай малын мах болох хонь, ямааны махыг БНХАУ-д гаргаж байгаа бөгөөд энэ хүрээнд Бургастайн боомтоор "Мон-Тува" компани өнгөрсөн хоёрдугаар сард 16 тонныг, дөрөвдүгээр сард дахин 56 тонныг гаргажээ. БНХАУ-аас гадна ОХУ адууны махыг их хэмжээгээр худалдан авч байгаа юм.

Монгол Улсад нийт 60 гаруй махны үйлдвэр үйл ажиллагаагаа явуулж байгаагийн тал хувь нь бүтээгдэхүүнээ экспортлох эрхтэй байна. Экспортын зах зээлд БНХАУ, ОХУ, БНСУ, Арабын Нэгдсэн Эмират зэрэг улс багтаж байгаа талаар Монголын Үйлдвэр хөдөө аж үйлдвэрийн танхимаас мэдээллээ.

Хэдий тийм боловч оны эхний дөрвөн сарын байдлаар голчлон ОХУ болон БНХАУ-д мах нийлүүлсэн байна. Үнийн хувьд нэг кг үхрийн хөлдүү махыг ОХУ-д 7-9 ам.доллараар, БНХАУ-д 4 ам.доллараар гаргасан талаар салбарынхан өмнө нь мэдээлж байсан юм.

Махны экспортод өвчлөл, дотоодын үйлдвэрлэлийн стандарт зэрэг хүчин зүйл нөлөөлж байгаа аж. Хамгийн сүүлд л гэхэд БНХАУ-ын Мэргэжлийн хяналтынхан баруун бүсийн таван аймгийг өвчингүй эрүүл бүс гэж тогтоосны дүнд эндээс хонь, ямааны мах экспортлох боломжтой болсон байна.

Т.Элиса