МАН-ын Бага хурал өчигдөр 23.00 цаг хүртэл үргэлжилж, сонгуульд МАХН-тай эвсэх, эсэх асуудлаа нэг тийш болгожээ. МАХН-ынхан эвсэх тохирооноосоо буцаж, шинэ болзол тулгаж эхэлсэн тул МАН-ын бага хурлын шийдвэрээр сонгуульд эвсэхгүй гэсэн шийдвэр гаргасан байна.

МАН, МАХН-ын хамтран байгуулсан Эвсэх ажлын хэсэг сар гаруйн хугацаанд ажиллаж, тодорхой зүйлүүдэд тохиролцоод байв. Тухайлбал:

• УИХ-ын 76 мандатыг 51:25-ын харьцаагаар хуваан нэр дэвшүүлэх
• УИХ-ын сонгуульд ялалт байгуулбал Ерөнхий сайд, УИХ-ын даргын албан тушаалыг нэг, нэгээр томилно
• Орон нутгийн сонгуульд 2012 оны орон нутгийн сонгуулийн үр дүнг харгалзан нэр дэвшүүлэхээр тохирчээ.

Гэтэл МАХН-аас тохиролцсоноосоо буцаж дараах шаардлагыг тавьсан аж. Үүнд:

• Орон нутгийн сонгуульд нэр дэвшигчдийн 20-30 хувь нь МАХН-ын гишүүн байна.
• Орон нутгийн сонгуульд ялалт байгуулбал Засаг дарга, ИТХ-ын даргаа сөөлжиж томилъё гэх мэт тохиролцоонд тусгаагүй шаардлага тулгасан учир МАН-ын Удирдах зөвлөлийн хурлаар эвсэхээ больё гэсэн шийдвэр гаргаснаа Бага хурлын гишүүддээ танилцуулжээ.

Угаас энэ асуудлаар байр суурийн зөрчилдөөнтэй байсан Бага хурлаар МАХН-тай эвсэхээс татгалзсан шийдвэр гаргалаа.

МАН-аас МАХН-нд татгалзах аргагүй санал тавьсан ч барьцаа ахиулсаар ганцаар хоцров. МАХН-ын хувьд ганц намын даргынхаа нэр нөлөөгөөр 2012 оны УИХ-ын сонгуульд оролцож чамлахааргүй тооны суудал авсан ч гишүүд нь өнгөрсөн дөрвөн жилд улс төрд нөлөөгөө тогтоож, хүлээн зөвшөөрөгдөж чадсангүй.

Боловсон хүчнийх нь нөөцтэй харьцуулахад УИХ-ын 21 мандат бол МАХН-д боломжийн тоо. Харин орон нутагт хөлөө бэхжүүлэх гэсэн намын даргын санаархал сонгуульд МАН-тай нэгдэн орж, ялалт байгуулж болох магадлалыг үгүй хийж орхив.