Ер нь шөнийн цагаар гар утасныхаа дэлгэц рүү харна гэдэг тун дэмий санаа. Ялангуяа гэрлээ унтраачихсан, орондоо хэвтэж байхдаа харах бүр ч дэмий.

Учир нь ухаалаг утасны дэлгэц дээрх зүйлсийг өдрийн нартайд ч харуулахын тулд бүтээгчид нь тод цэнхэр туяа ялгаруулах аргыг сэдсэн юм. Гэвч тэд хүмүүс унтдаг гэдгийг мартсан.

Тийм ч болохоор шөнийн цагт таны тархи утасны дэлгэцээс ялгарах цэнхэр туяанд будилж гүйцдэг. Үүнээс болж мелатонин буюу “унтах цаг боллоо” гэдгийг сануулдаг гормон ялгарахаа болино.

Ингээд шөнийн цагаар гар утсаа их ашигласнаас болж, таны нойрны хэмнэлд өөрчлөлт орох төдийгүй унтаж чадахгүй, орондоо хөрвөөх нь ихэсдэг. Цаашлаад таны эрүүл мэндэд ч сөрөг нөлөөтэй.

Хэрвээ та iPhone хэрэглэдэг бол шинэхэн гарсан iOS 9,3 үйлдлийн системийн ачаар “Шөнийн горим”-д шилжиж болно. Утасны дэлгэцээс ялгарах цэнхэр туяаг бууруулж, илүү дулаан гэрэл цацруулснаар таны тархи дахин мелатонин ялгаруулж, нойрны дутагдлаас сэргийлэх юм.

Харин Андроид хэрэглэгчид Twilight болон Night Shift: Blue Light Filter гэсэн үнэгүй аппликейшнүүдийг ашиглаж болно. Мөн л нойр хулжихаас сэргийлж, мелатонин ялгарах нөхцөлийг бүрдүүлэх аж.

Гэхдээ нэг зүйлийг сануулахад утасны дэлгэцийн гэрэл таны нойрыг хулжааж буй ердөө ганцхан шалтгаан юм. Учир нь та утсаараа юу хийж буйгаас шалтгаалж нойр хулжиж болно.

Жишээ нь мэдээ унших, нийгмийн сүлжээний сайт ашиглах, интернетээр хэсүүчлэх зэрэг нь тархины үйл ажиллагааг идэвхтэй горимд шилжүүлж байдаг болохоор цэнхэр гэрлээс дутахааргүй нойр хулжаадаг юм байна.

Тэгэхээр орондоо орохоор шийдсэн л бол утсаа аль болох хол тавьж заншаарай. Дээрээс нь утасныхаа сүлжээг хаахад гэмгүй.