Хос тогорууны үүрэнд голдуу хоёр өндөг байдаг. Тэгэхээр шувуунд хоёр дэгдээхэй байх ёстой мэт санагдаж байгаа биз. Гэхдээ тогоруу нэг л дэгдээхэйтэй байдаг. Дэгдээхэй өндөгний эмзэг хальснаас гарсны дараа хэсэг хугацаанд туяхан хөлөн дээрээ тогтож ядан зогсож орчноо ажиглан хардаг. Энэ үедээ өөр өндөгнөөс гарч байгаа үе чацуутан ангаахайгаа хараад шууд дайрч хошуугаараа хүзүүг нь тас тонших оролдлого хийдэг. Хоёр ангаахай үзэлцсээр хүчтэй нь үлддэг. Ангаахайтай төстэй резинэн тоглоом хажууд нь тавихад түүнийг цоо тоншдог байна. Хамгийн сонин нь төрүүлсэн эх эцэг нь энэ үзэгдлийг хараад тайван ажигладаг ажээ. Дөрвөн долоо хоног орчмын дараа тогорууны ангаахайн түрэмгий тулалдах гэсэн зан нь арилдаг ч нэг ой хагасын дараа бэлгийн бойжилт нь гүйцэхэд энэ зан нь дахин илэрч өөрийн нас чацуутан тогорууны толгойг тонших гэж зүтгэдэг аж.

С.Туул