Нидерланд улс гэхэд магадгүй таны санаанд уламжлалт салхин тээрэм, модон ултай голланд шаахай, амтат бяслаг, гауда вааран эдлэл орж байгаа байх. Нутаг дэвсгэрийн ихэнх нь нам дор газар тул Нидерланд буюу “Нам дор газар” гэж энэ орныг нэрлэжээ. Нидерландууд намаг шавартай газрыг далангаар хааж, дараа нь усыг соруулж хатаах замаар шинэ газар нутгийг бий болгож байсан түүхтэй.

Намаг шаврын усыг соруулж хатаахдаа салхин тээрэм ихээр ашигладаг байсан нь өдгөө Нидерландын бас нэгэн чимэг болсон юм. Тус улсын хөдөө талаар үзэмжит гоёмсог салхи тээрэмнүүд ярайж харагдах нь жуулчдыг татах бас нэгэн арга гэлтэй.

Түүнчлэн Нидерландын хамгийн гол бэлгэдлүүдийн нэг бол алтанзул цэцэг юм. 1559 онд Швейцарийн ботаникч Конрад Жеснэр Альпийн нуруугаар аялж яваад нэгэн өвөрмөц цэцэг олжээ. Улаан дэлбээтэй, анхилуун зөөлөн үнэртэй энэхүү цэцгийг Жеснэр tulipa turcarum буюу товчоор tulip /Алтанзул/ гэж нэрлэсэн байна.

Алтанзул цэцэг дөрвөөс тавдугаар сард цэцэглэдэг учир жуулчид энэ улирлыг тааруулж Нидерландад зорчих нь илүү элбэг аж.

16 сая хүнтэй энэ улсын иргэн бүр, хааны гэр бүлийнхэн ч бас бас дугуйны хорхойтон. Ард иргэдийн ихэнх нь дугуй хэрэглэдэг болохоор замын хөдөлгөөн ч эмх цэгцтэй, дээр нь агаарын бохирдол бага. Судалгаагаар Нидерланд улс нэг хүнд ноогдох унадаг дугуйны тоогоороо тэргүүлж байжээ.

Нидерландын нийслэл Амстердам хот. Тус хот нь олон тооны суваг, 1000 шахам гүүрээрээ зартай. Урлагийн түүхээс эхлээд хар тамхины түүхийг хүртэл агуулсан музей Амстердамд бий. Ван Гог, Вермеер, Рембрандт зэрэг түүхэнд нэрээ мөнхөлсөн суут зураачдын бүтээлийг өлгий нутгаас нь сонирхох боломж бас бий шүү.

Эх сурвалж: Adme.ru