“Балетын гала” үдэшлэг Улсын дуурь бүжгийн эрдмийн театрын тайзнаа тавигдана. Энэ сарын 16-нд болох уг тоглолтонд АНУ-ын “Нью Жерси” балетын компанийн гоцлол бүжигчин Б.Түвшинбат оролцох юм байна. Тоглолтын бэлтгэл хийж буй үеэр очиж, уран бүтээлчтэй уулзаж ярилцлаа.

-Сонгодог урлагийн ямар бү­тээ­лүүдээс үзэгчдэд бэлэг барихаар бэлдэж байна вэ?
-“Балетын гала” тоглолтыг Дуурь, бүжгийн эрдмийн теат­рын балетчдийн хамт зохион байгуулахаар бэлтгэж байгаа.

Тоглолт энэ сарын 16-нд нэг л удаа болох юм. Үзэгчдийн сайн мэдэх “Нойрссон гүнж”, “Хунт нуур” балет болон мо­дерн бүжгийн цоморлигуудаас сонирхуулахаар болсон. Хоёр цаг гаруй хугацаанд үргэлж­лэх “Балетын гала” үдэшлэг үзэгчдийг уйдаахгүй гэдэгт итгэж байна.

-Америкийн “Нью Жер­си” балетын гоцлоочийн хувьд урд нь Дуурь, бүж­гийн эрдмийн театрын тайз­наа тавигдаж байгаагүй, сонгодог бүтээлүүдээс со­нир­хуулж болоогүй юм уу?
-Том бүтээл тавихын тулд их хэмжээний хөрөнгө, мөнгө шаардлагатай байдаг. Мөн багагүй хугацааны бэлтгэл сургуулилт ч хийх хэрэгтэй болно. Ийм боломж бүрдээ­гүй учраас “Балетын гала” тоглолт хийхээр шийдсэн юм.

-Яагаад Америкийн ба­ле­тийн компанид ажиллах болсон юм бэ?
-Энэ тухай яривал урт түүх болно. Америкт ажиллах нь балетчин хүн бүрийн мө­рөө­дөл байдаг. Миний хувьд ч тийм байсан. Америк руу явахаас өмнө Улсын дуурь, бүжгийн эрдмийн театрт ар­ваад жил ажилласан. Дараа нь Америк руу очиж “Нью Жерси” балетийн компанид шалгалт өгөөд тэнцэж өнөөдрийг хүр­тэл ажиллаж байгаа.

-“Нью Жерси” ком­па­нид ажиллаад хэдэн жил болж байна. Энэ хугацаанд ямар бүтээл туурвисан бэ?
-Арваад жил болж байна. Сонгодог болон орчин үеийн бүжгүүд дээр ажилласан.

-Өнгөрсөн хугацаанд гадаадын уран бүтээлч­дийн хамт монгол бүжгэн жүжиг дээр ажиллаж байв уу?
-Тэдэнтэй энэ тухай ярь­сан. Сонсоод монгол балет байдаг гэхэд итгэхгүй гайхаж байлаа. Дараа нь ганц, хоёр монгол балетын хэсгээс тавьсан.

-Гавьяат жүжигчин, ба­лет­чин Д.Алтанхуягийг Аме­­рикт ажиллаж байгаа гэж сонссон. Та хоёр уулз­даг уу?
-Утсаар л ярьсан. Бид хоёр өөр өөр хотод амьдардаг болохоор уулзах боломж га­раа­гүй.

-Хэдэн настайгаасаа ба­ле­тын урлагтай нөхөр­лөсөн бэ?
-Миний ээжийг Д.Дорж­па­лам гэдэг. Циркийн нугараач хүн байсан. Намайг балетчин болоход ээж маань нөлөөлсөн юм. Би 11 настайгаасаа бале­тын урлагаар хичээллэж эхэлсэн.

Дуурь, бүжгийн эрдмийн театрын хамт олонтойгоо өнгөрсөн оноос хойш хоёр дахь удаагаа хамтарч ажил­лаж байна. Намайг дэмжиж хамтарч ажилласан Б.Сэргэ­лэн даргатай театрын хамт олон болон энэ удаагийн үдэшлэгийг ивээн тэтгэж байгаа “Madam Dior” буюу хатагтай Г.Батчулуунд талар­хаж байгаагаа танай сони­ноор дамжуулан уламжлая.