УИХ-ын чуулганы нэгдсэн худалдаан болж байна. 

Хэлэлцэх асуудлын дарааллаар “Төрийн өмчит хуулийн этгээдийн хувьцааг 2026-2028 онд биржээр олон нийтэд нээлттэй худалдах, төрийн өмчийг хувьчлах, өөрчлөн байгуулах үндсэн чиглэл батлах тухай” асуудлыг хэлэлцэж байна. 

Энэ үеэр УИХ-ын гишүүн О.Цогтгэрэл үг хэлж, асуулт асуулаа.

-Төрийн өмчийг олон нийтийн өмч болгох, улмаар төрийн оролцоог алсуур бууруулах зарчим бүхий бодлогын баримт бичиг орж ирж байгааг талархан хүлээн авч байна. Гэхдээ энэ нь хэлбэрийн төдий баримт бичиг биш байгаасай гэж хүсэж байна. Өмнө нь ийм агуулгатай, тунхгийн шинжтэй, хэлбэржсэн олон баримт бичиг гарч байсныг дурдах нь зүйтэй.

Аливаа муу зүйлд сайн тал байдаг гэдэг. Өнөөдөр эдийн засгийн бодит нөхцөл байдал бодлогын түвшинд хөрсөн дээрээ бууж эхэлж байна. Өөрийгөө социал-демократ үзэлтэй гэж тодорхойлдог, төр том байх ёстой, төрийн өмчөөр дамжуулан асуудлыг шийдэх ёстой гэж үздэг улс төрийн хүчин анх удаа төрийн оролцоог бууруулж, хувьчилж, олон нийтийнх болгох тухай ярьж эхэлж байгаа нь нөхцөл байдал бодитой болж буйн илрэл гэж харж байна.

Гэхдээ яагаад хэлбэрийн төдий гэж болгоомжилж байна вэ гэвэл, жишээ нь Төрийн банкийг хувьчилсан, олон нийтийнх болгосон гэж нэрлээд ердөө 5 хувийг нь хувьчилсан. Иргэдийн сонсоход Төрийн банк хувьчлагдсан мэт ойлгогддог ч бодит байдал дээр тавхан хувь л гарсан. Түүнчлэн гаргасан хувьцаа миний санаж байгаагаар нэгж нь ойролцоогоор 600 төгрөгөөр гарч, өнөөдөр 20-30 хувиар унасан байдалтай байна. Засаглал, менежментэд нь бодит өөрчлөлт орсон зүйл байхгүй.

Иймд хувьчлал, олон нийтийн өмч болгох гэж байгаа энэ ажлыг бодитой, үр дүнтэй хийхийн тулд,

• нэгдүгээрт, яг яаж хэрэгжүүлэх гэж байгаа вэ, 
• хоёрдугаарт, ялангуяа энд дурдагдсан эрчим хүчний салбарын олон компаниудын хувьд үр дүнд хүрэх боломж бий юу гэдэг асуулт гарч ирж байна.

Эрчим хүчний салбар ашигтай ажиллахын тулд хамгийн гол нь менежмент, үнэ чөлөөлөлт чухал. Гэтэл үнэ нь хатуу зохицуулалттай, алдагдалтай, өртөг ашгаа удирдах боломжгүй нөхцөлд хувьчиллаа гээд гадна, дотнын хэдэн хөрөнгө оруулагч орж ирээд, улмаар итгэл алдаж буцаад гарчихдаг жишээ олон. Ингэснээр Монгол Улс хөрөнгө оруулагчдын итгэлийг алдах эрсдэл бий.

Өмнө нь Багануур зэрэг жишээн дээр институционал хөрөнгө оруулагчид орж ирээд дараа нь бүгд гарч, Монголын зах зээлийг орхисон тохиолдлууд бий. Ийм алдааг давтахгүйн тулд ямар бодит арга хэмжээ авч байгаа вэ?

Энэ ажлыг жинхэнэ утгаар нь, хэлбэр хөөхгүйгээр үр дүнтэй хэрэгжүүлэхийн тулд давхар татвар, суутгал, татварын орчин, зохицуулалтыг иж бүрнээр нь харах шаардлагатай. Хөрөнгийн зах зээлтэйгээ хэрхэн уялдуулах, ялангуяа үнэ чөлөөлөлтийн асуудлыг яаж шийдэх вэ гэдэг нь хамгийн чухал.

Үнэ чөлөөлөхгүйгээр эрчим хүчний салбарыг хувьчилна гэдэг нь бодит амьдралд нийцэхгүй, үлгэртэй адил зүйл. Тиймээс энэ бүх асуудал дээр бодитойгоор хандаж, жинхэнэ утгаараа хийх хүсэл, улс төрийн зориг байгаа эсэхийг тодорхой хариулт өгөөч. 

ШУУД ҮЗЭХ: