Ажилтны зохиосон амархан нууц үгийг хакерууд олж авснаар 158 жилийн түүхтэй компанийг дампууруулж, 700 хүнийг ажилгүй болгожээ.

Тодруулбал 2023 онд Акира хэмээх хакерын бүлгэм Их Британийн “KNP” тээврийн компанийн ажилтны нууц үгийг олж авсан.

Улмаар тус компанийн сүлжээнд нэвтрэн бүх өгөгдлийг шифрлэж, компанийн дотоод системийг түгжсэн байна. Тухайн үед хакерууд компанийн удирдлагуудаас мөнгө нэхсэн.

Тэд тодорхой үнэ хэлээгүй ч компанийн мэргэжилтнүүд дор хаяж 5 сая фунт стерлинг /20 гаруй тэрбум төгрөг/ гэж тооцоолсон ба тийм хэмжээний мөнгө байгаагүй тул бүх мэдээллээ устгуулсан аж.

Үүний улмаас компани дампуурахад хүрч, 700 гаруй хүн ажилгүй болжээ.
Гэсэн ч компанийн захирал Пол Абботт ажилтанд нь хүндээр тусч болзошгүй гэж үзэн, түүний нууц үг алдагдсанаас болж компани дампуурсан тухай хэлээгүй аж.

Энэ мэтчилэн кибер халдлагын эрсдэл улам нэмэгдэж, нэр хүндтэй компаниуд хакеруудын бай болж байна.

Энгийн, тааварлахад амархан нууц үг нь зөвхөн таныг бус хамт олон, гэр бүл, байгууллагыг тань ч эрсдэлд оруулж болзошгүй юм.

Хэрэв та доорх төрлийн нууц үг ашигладаг бол таныг эрсдэлд оруулж болзошгүй. Үүнд

• Төрсөн өдөр
• Утасны дугаар
• Өөрийн эсвэр гэр бүлийн гишүүдийн нэр
• Давтагдсан эсвэл дараалсан тоо, үсэг зэрэг багтана.

Том, жижиг үсэг, тоо, тусгай тэмдэгтийг хослуулж, давтагдашгүй нууц үг /Жишээ нь: G9!zT4#mх5670 гэх мэт/ зохиох хэрэгтэй юм.

Эх сурвалж: ВВС