Монгол Улсын Ерөнхий сайд Г.Занданшатар Хүчирхийллийн эсрэг үндэсний төв, МОНФЕМНЕТ Үндэсний сүлжээ, Гүнж төв,  Хөөрхөн зүрх зэрэг ТББ, Монголын Залуучуудын эвсэл, Монголын эмнести интернешнл зэрэг иргэний нийгмийн байгууллагын төлөөлөл болон НҮБ-ын Хүн амын сангийн төлөөлөгчийг хүлээн авч уулзлаа.

Энэ үеэр иргэнийн нийгмийн байгууллагын төлөөллүүд нийгэмд тулгамдаж буй асуудлаар мэдээллээ. Тодруулбал, "2025 оны байдлаар нийт хүн амын 19 хувийг 0-18 насны охид эзэлдэг. 

Хүчирхийлэл тэр тусмаа жендэрт суурилсан хүчирхийлэлтэй холбоотой асуудал ярихаар нэлээн жин дардаг хүн амын бүлэг нь охид. Мөн мэдээлэгдээгүй гэмт хэргийн цаана дийлэнхдээ бага, өсвөр насны охид хохирсон байдаг. Харин мэдээлсэн гэмт хэргийн тухайд ихэвчлэн насанд хүрсэн эмэгтэйчүүд, өөрийгөө хамгаалах мэдлэгтэй байгаа учраас ханддаг байна. Харамсалтай нь маш олон охид хаалганы цаана хохирч үлддэг.  

Дэлхий нийтээр охидын эрхийн асуудлаар 2012 оноо хойш анхаарч ажиллах хэрэгтэй гэдгийг НҮБ-ын Ерөнхий Ассамблейгаар тунхаглаад маш олон улс орнууд охидын эрхийн асуудалд онцгой хүн ам гэж онцгой анхаардаг болсон. Манай улсад энэ асуудал төрийн бус байгууллагуудын хэмжээнд л явдаг.

Охидын эрхтэй холбоотой маш олон эмзэг асуудлууд нэг нь бол гэр бүл, бэлгийн хүчирхийлэл. Мөн өсвөр насны охидын жирэмслэлт юм. Охидын төрөлтийг бууруулах бодлого байхгүй, үйлчилгээ үзүүлэх нарийн мэргэшсэн төрийн байгууллагагүй. 

Маш эмзэг нь бэлгийн хүчирхийлэлд өртсөний улмаас жирэмсэлж, хүүхэд төрүүлж буй охидын тоон мэдээлэл бий. Нийт өсвөр насны охидын төрөлтийн 3-5 хувь, зарим жилүүдэд 8 хувийг бэлгийн хүчирхийллийн улмаас жирэмсэлж, хүүхэд төрүүлсэн охид эзэлж байна. 

Нэн яаралтайгаар анхаарал хандуулах шаардлагатай нийгмийн онцгой бүлэг юм байна гэж авч үзээд Ерөнхий сайд болон бусад сайдууд анхаараасай. 

Жишээлбэл, хүүхэд төрүүлсэн өсвөр насны охин гэрээсээ хөөгдөөд орох оронгүй болоход хүүхэдтэй нь хамт авч хамгаалдаг төрийн байгууллага байдаггүй" гэв. 

ҮЗЭХ: