Сүүлийн нэг сарын турш ипотекийн зээлийн хүүг 8-аас 5 хувь болгон бууруулах амлалт хэзээ хэрэгжих,  энэ нь эдийн засагт ямар нөлөө үзүүлэх вэ гэсэн маргаан, мэтгэлцээн  үргэлжилсээр байна.

Өнөөдөр Эдийн засгийн байнгын хорооны хуралдаанаар ч энэ сэдвийг хөндлөө. УИХ-ын гишүүн А.Тлейхан өнгөрсөн баасан гарагт БХБ-ын сайд З.Баянсэлэнгээс энэ талаар тодруулах гэсэн боловч сайд өвчтэй тул чуулганы хуралдаанд оролцоогүй.

Иймд тэрээр Монголбанкны Ерөнхийлөгчид хандан, “Салбарын сайд З.Баянсэлэнгэ хэвлэлийн бага хурал хийн, та  нар эргэлзэх хэрэггүй. Ипотекийн зээлийн хүүг таван хувь болгон бууруулсан гэж албан ёсоор мэдэгдсэн. Бараг маргаашнаас нь банкууд хүүгээ бууруулах юм байна гэж ойлгохоор ярьсан. Гэтэл бодит байдал дээр банкууд хуучин хүүгээ мөрдсөөр байна. Олон түмний дунд хүлээлт үүсчихлээ. Та тодорхой хариулт өгөөч” гэв.   

Монголбанкны Ерөнхийлөгч Н.Золжаргал “Таван хувийн хүүтэй зээлийг гуравдугаар сард багтаан шийдвэрлэнэ. Бэлтгэл ажлууд эхэлсэн. Хүүг таван хувь болгон бууруулахын тулд нийт таван гэрээнд болон ипотекийн зээлийн журамд өөрчлөлт оруулах шаардлагатай. Бид БХБ-ын яамны удирдлагуудтай олон удаа уулзан, хамтран ажиллаж байна. Ирээдүйн өв сангийн тухай хуулийг баталсан тул энэ хуульд нийцүүлэн хийх  зохицуулалтууд бий” гэв.