“Монголын сайхан бичигтэн” улсын уралдааны 19 дахь удаагийн шилдгүүд тодорч, өнөөдөр шагналаа гардлаа.

МОНЦАМЭ агентлагийн “Хүмүүн бичиг” сонины газраас жил бүр уламжлал болгон зохион явуулдаг “Монголын сайхан бичигтэн” улсын уралдаанд 21 аймаг, нийслэлийн есөн дүүргээс 1000 гаруй хүн оролцжээ.

“Монголын сайхан бичигтэн-2015” уралдааны тэргүүн байрын шагналыг Дундговь аймгийн Сайнцагаан сумын 12 дугаар ангийн сурагч Ганбагана, Дархан –Уул аймгийн 29 дүгээр дунд сургуулийн 12 дугаар ангийн сурагч Шинэбаяр, Увс аймгийн Улаангом сумын нэгдүгээр сургуулийн 12 дугаар ангийн сурагч Янжиндулам, нийслэлийн “Буянт-Ухаа” цогцолбор сургуулийн 12 дугаар ангийн сурагч Буянхишиг нар хүртлээ.

Мөн сурагчдын ангилалд Баянхонгор аймгийн Баянцагаан сумын 10 дугаар ангийн сурагч Түвшинтүлхүүр, Ховд аймгийн Жаргалант сумын “Цаст Алтай” цогцолбор сургуулийн 10 дугаар ангийн сурагч Болор-Уянга нар, уран бичлэгийн төрөлд нийслэлийн Бичиг, соёл, боловсролын төвийн уран бүтээлч Одбаяр, насанд хүрэгчдийн ангилалд Орхон их сургуулийн монгол хэл, уран зохиолын багшийн дөрөвдүгээр дамжааны оюутан Сувд, мэргэжлийн багш нарын ангилалд Баянхонгор аймгийн “Эрдэнэмандал” ахлах сургуулийн монгол хэл, уран зохиолын багш Даваадолжин нар шалгарлаа.

Бүтээлийн ангилалд Сэлэнгэ аймгийн Хөтөлийн ерөнхий боловсролын сургуулийн монгол хэл, уран зохиолын багш Гэрэлмаа, сайхан бичигтэн төрөлд Баянхонгор аймгийн Баянцагаан сумын сургуулийн 10б ангийн хамт олон, тус ангийг улсын уралдаанд бэлтгэсэн багш Болормаа нар тэргүүлсэн байна. Тэргүүн байрын шагналтнуудад Монгол Улсын Ерөнхийлөгч Ц.Элбэгдорж шагналыг гардуулан өгөв.

Шагнал гардуулах ёслолын үеэр Монгол Улсын Ерөнхийлөгч Ц.Элбэгдорж,

-Монгол түмний бүтээсэн гайхамшигт өв соёл, түүнийг өдий болтол авч яваа Монголын ард түмэн, монголчуудын хамгийн их бахархалтай өв соёлын нэг бол монгол бичиг минь юм. Монгол хүн бүхэн монгол бичгийнхээ тухай сонсож, монгол бичгээрээ уншиж, бичиж, монгол бичгийнхээ тухай магтаалыг сонсоход байнга сэтгэл сэргэж, сайхан болж байдаг. Энэ бичиг өөрөө тийм гайхамшигтай эрчим хүчийг агуулсан бичиг байгаа юм. Бидний олон үе энэ бичгээрээ бичиж, суралцаж, эрмэлзэж, зүрх сэтгэлдээ тээж ирсэн учраас энэ бичиг тийм гайхамшигтай гэж боддог.

Бид Азийн бичлэгтэй, татлагатай улс орнуудыг цуглуулж үзэсгэлэн гаргахаар ярьж байгаа. Энэ нь эв нэгдлийн, эв найрамдлын, улс үндэстнүүдийн харилцан ойлголцлын, бас бичиг соёлоо хүндлэхийн их сайхан илэрхийлэл юм гэж бодож байгаа. Энэ дундаас харахад нэг зүйл байдаг. Монгол бичгийн уран татлага бол Азийн бусад Хятад, Солонгос, Япон зэрэг орны бичгээс их өвөрмөц юм. Үнэхээр гайхамшигтай, үнэхээр урлаг гэдэг нь харагддаг. Зөвхөн бичиг, соёл төдийгүй, энэ бол урлаг юм. Ямар олон төрлөөр, ямар олон хэлбэрээр, зураг хүртэл болгож, яаж илэрхийлж болдгийг харуулдгаараа гайхамшигтай бичиг байгаа юм.

Уйгагүй хичээл зүтгэлээрээ энэ бүхнийг хийж, сургууль бүхэн дээр монгол бичгийг дэлгэрүүлэхийн төлөө, бүтэн анги, бүтэн сургуулиараа монгол бичигтэн болж, тэр бичгээрээ бичдэг болохын төлөө, цаашдаа бүтэн хамт олон, бүтэн улсаараа монгол бичгээрээ бичиж, монгол бичгээрээ бахархдаг болохын төлөө бүгдээрээ хичээн зүтгэцгээе” гэлээ.