Сумо бөхийн дээд зин­даанд барилдаж буй Ама Д.Бямбадоржид мэр­гэж­лийн сумо бөхийн ур чад­ва­рыг чадамгай эзэмшиж, дээд зиндаанд амжилттай барилдан спортын өндөр амжилт үзүүлж байгааг нь үнэлж “Алтан гадас” одон хүртээснээ Ерөнхийлөгч Н.Энхбаяр өчигдөр гар­дуул­лаа.

Төрөөс шагнал хүртэж буй Амад баяр хүргэхээр ээж Д.Мягмар­сүрэн, ах Д.Лхагвадорж, дэвжээний багш Асахи Фүжи нар ирсэн байв. Ама монгол үндэсний хувцсаар гоёжээ. Хар ногоон өнгийн дээл, шаргал хор­гой­гоор эмжсэн хантааз, монгол гутал өмсчээ. Хан­тааз нь ембүү хэлбэртэй мөнгөн товчтой бөгөөд улаан шүрэн чимэгтэй хэт зүү­сэн байлаа. Д.Бямба­дор­жийг шагнал аваад гарч ирэхэд ээж нь хадаг, мөн­гөн аягатай сүү барин уг­таж, баяр хүргэх­дээ ну­лим­­саа байн байн арчиж байсан. Мөн ах Лхаг­ва­дорж, дэвжээний багш хоёр нь үнсч угтав. Дараа нь тэрбээр сэтгүүлчдийн асуултад хариулт өгсөн юм.

-Төрөөс шагнал хүрт­сэнд нийт уншигчдынхаа өмнөөс баяр хүргэе.
-Их баяртай байна, сай­хан байна. Өнөөдөр Төрийн ордонд орж, Ерөнхийлөгчөөс шагнал аваад их сайхан бай­на. Мон­голд өнөтэй сайхан өвөл болж байна. Монголын ард түмэн, өвгөд буур­лууд­даа сар шинэ­дээ сайхан ши­нэлээрэй. Үүнээс хойш би болон манай сумочид улам их бэлтгэл хийж, та бүгдийнхээ итгэлийг алдахгүйг хичээнэ.

-Өнгөрсөн сарын ба­рил­даанд озэки цолыг ава­хад ойрхон байсан шүү…
-Өдөр бүр хийх ёстой бэлтгэлээ ахиулна, хичээнэ. Маш их хичээнэ гэж бодож байгаа.

-Хоёр аваргатай барил­дахад ямар байсан бэ?
-Ялна гэсэн итгэлтэйгээр барилдсан боловч Дагвадорж аваргад ялагдаж, Даваа­жар­гал аваргыг давсандаа баяр­тай байна.

-Таныг озэки цолыг авч чадна гэдэгт олон хүн итгэж найдаж байгаа..?
-Сайн бэлтгэл хийгээд дараа сард сайн барилдана. Өмнөх барилдаануудад гар­га­сан алдаагаа засахын төлөө улам хичээх болно.

-Та хэзээ буцах вэ. Сар шинийг Монголдоо угтах уу?
-Шинийн нэгний өглөө нисэх учраас мөрөө гаргаж, гэрийнхэнтэйгээ золгоод буц­на даа. Битүүний өдөр бол “Цаг цагаар нэг цадна, цагаан сараар нэг цадна даа” гэдэг болно доо. /инээв/

-Монгол бөхчүүд япон­чуу­дыг бодвол сийрэгхэн барилддаг. Энэ нь монгол бөхчүүдийн онцлог уу, ба­рил­дааны онцлог байдаг уу?
-Монгол хүнтэй барил­дахад эвгүй л дээ. Бүгд үн­дэс­ний бөхийн мэхээ мэддэг. Өнгөрсөн сарын барилдаанд Асасэкирюүд би хөлөө ава­хуулаад унасан нь харамс­маар байсан боловч энэ мэ­тээр монголчууд маань япон бөхчүүдээс илүү уран сайхан мэхийг үзүүлдэг.

-Сумо бөхөд яг одоо озэки цолтны орон зай үгүйлэгдэж байх шиг. Танд ийм зүйл мэдрэгдэж байна уу?
-Шинэ үе гарч ирж байгаа учраас сумо бөх цаашид улам сайхан сонирхолтой, өрсөлдөөнтэй болно байх гэж хувьдаа бодож байна.

-Уучлаарай. Энэ баярт мөчөө аавтайгаа хуваалц­сан бол сайхан байсан байх даа?
-Манай аав бас “Алтан гадас” одон авч байсан. Аав­тайгаа адил шагнал авч бай­гаа­даа их баяртай байна. Аав гэдэг хүний орон зайг юу ч нөхөж чадахгүй. Аавыгаа байгаа юм шиг бодож, улам хичээж, хэлж сургаж байсан зүйлүүдийг санаж өөрийгөө эрчилдэг.

-Танд баяр хүргэхээр Монгол Улсын начин Лхаг­ва­дорж ах тань иржээ. Ахтайгаа сумо, үндэсний бөхийн талаар ярилцдаг уу?
-Хүмүүс хоорондоо сумо ярина. Ахаас илүү манай ээж надад их заадаг хүн шүү дээ. /инээв/

-Өнгөрсөн сарын ба­рил­дааны дараа ээж тань юу гэж хэлсэн бэ?
-Сайн барилдахаас илүү бэртэл гэмтэлгүй барилдаад сайхан яваад ирэх нь ээжийн минь жаргал юм болов уу гэж боддог.

-Үндэсний спортыг эзэг­­нэж буй монголчуудад япончууд хэр ханддаг вэ?
-Би бие жижигтэй учраас япончууд дэмждэг. Сайхан хүндэтгэнэ, хайрлана. Японы ард түмэн биднийг их сайхан хүлээж авдаг.

-Монгол удахгүй сумо­гийн дэвжээтэй болно. Мөн сумо олимпийн төрөлд орох магадлалтай байгаа. Энэ талаар та ямар бо­дол­той байна вэ?
-Монгол бөхчүүд маань сайн барилдаж байгаа юм чинь олимп, дэлхийн аварга болон олон улс орны тэм­цээнд амжилттай оролцон олон медаль авч, улс орны­хоо нэр хүндийг өргөнө байх гэж бодож байна.

-Ирэх наймдугаар сард манай улсад тойргийн башё болно. Сумогийн олон бөх ирэх үү?
-Магадгүй макучи зин­дааны бүх бөх ирнэ. Монго­лыг дэлхий дахинд таниулсан том сурталчилгаа болно. Су­мо­гийн бөхчүүд сонирхолтой сайхан барилдаануудыг үзүү­лэх байх гэж бодож байна.

-Та гэр бүлтэй болж байна уу?
-Одоохондоо эхнэр авах бодолгүй байна. Хамгийн тү­рүүнд өмнөө тавьсан зорилт­доо хүрэхийн төлөө оюун санаа болон бие сэтгэлээ дайчилна.

-Танд амжилт гаргахыг хүсье. Монгол түмнийхээ итгэлийг дааж сайхан ба­рил­даарай.
-”Итгэл алдахыг үхэлд тооц” гэж манай аав шүлэгтээ бичиж байсан. Ард түмнийхээ итгэл, сайхан хайрыг алдах­гүйг хичээнэ. Миний хувьд хичээнэ гэдэг хамгийн том үг. Бүхий л хүч, оюун санаагаа шавхаж, та бүхнийхээ итгэ­лийг алдахгүйн тулд, та бүг­дэдээ улам сайхан барил­дааныг үзүүлэхийн төлөө хи­чээнэ.

“Эсэгэ хама” дэвжээ­ний багш, 63 дахь аварга Асахи Фүжи сэтгүүлчдийн цөөн асуултад хариулт өгсөн юм. Сэтгүүлчдийн асуултыг Ама орчууллаа. Тэрбээр “Өөрөө орчуулах ямар эвгүй юм бэ” хэмээж байв.

-Таны бодлоор өнгө­рөгч нэгдүгээр сард Ама хэрхэн барилдсан бэ?
-Энэ сард арслангийн болзолтой барилдаанд оролц­сон. Өөрийнхөө барилдааныг гаргаж чадахгүй байх ч юм уу, сэтгэл зүйн бэлтгэл дутуу байсан болов уу.

-Башё эхлэхэд шавьдаа юу гэж хэлдэг вэ?
-”Урагшаа дайрч барилд, өөрийнхөө барилдааныг гар­га” гэж хэлдэг дээ.

-Сүүлийн үед монгол бөхчүүд сайн барилдаж байгаа. Монгол бөхчүүдийн талаар ямар бодолтой яв­даг вэ?
-Бүгд бэлтгэлээ их сайн хийдэг. Тийм учраас үр дага­вар нь гарч сайн барилдаж байгаа байх гэж бодож байна.

Д.Навчаа