Нийслэлийн нийтийн эзэмшлийн гудамж, зам талбай болон орон сууц гэр хорооллын доторх гудамж, зам талбайд халтиргаа гулгаа үүсэхээс урьдчилан сэргийлэх, үүссэн халтиргааг шуурхай арилгах зорилгоор өнөөдрөөс эхлэн байгууллагууд орчны цас мөсийг арилгаж байгаа эсэхэд хяналт явуулахаар болжээ.

Шалгалтаар аж ахуйн нэгж, байгууллагууд нь  өөрийн эзэмшил талбай, түүнээс гадна орчны 50 м хүртэлх талбайн хог цэвэрлэгээ, цас мөсөө  тогтмол арилгаж, халтиргаа гулгаа үүсгэхгүй байх арга хэмжээг авч байгаа эсэхэд хяналт тавих юм байна. 

Шалгалт явуулах ажлын хэсгийн бүрэлдэхүүнд Улаанбаатар хотын Захирагчийн ажлын алба, “Нийтийн үйлчилгээний Улаанбаатар нэгтгэл” ОНӨААТҮГ, Улаанбаатар хотын Шуурхай удирдлага, зохицуулалтын төв, Замын цагдаагийн газар, Нийслэлийн Мэргэжлийн хяналтын газар, Нийслэлийн Авто замын газрын дарга мэргэжилтнүүд оржээ. Мөн  тус ажлын хэсгээс халтиргаа, гулгаа ихтэй, цэвэрлэгээ хангалтгүй байгаа гудамж, талбайн судалгааг дүүрэг, цэвэрлэгээ үйлчилгээг хариуцагч байгууллага бүрээр гарган, зурагжуулж баримтжуулах гэнэ. 

Түүнчлэн цас ихээр орсон үед нийтийн эзэмшлийн талбайн цас мөс цэвэрлэгээний ажлыг гүйцэтгэх хүн хүч, машин техник, багаж хэрэгслийн хүрэлцээ, бэлэн байдал бүрдсэн эсэхийг шалган тоон судалгаа хийж, үнэлгээ өгч зөрчил дутагдал гаргасан албан тушаалтан, байгууллага, аж ахуйн нэгж иргэдэд хариуцлага хүлээлгэх талаар нийслэлийн удирдлагад танилцуулахаар болжээ гэж Нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.