Ашигт малтмалын хэрэг эрхлэх газраас ашигт малтмалын тусгай зөвшөөрлийн мэдээллийг олон нийтэд нээлттэй мэдээлдэг. Тус байгууллагаас гаргасан хамгийн сүүлийн тайлан буюу 2014 оны арваннэгдүгээр сарын байдлаарх хүчин төгөлдөр тусгай зөвшөөрлийн мэдээллийг үндэслэн дараахь инфографикийг бэлдэв.

Монголд хүчин төгөлдөр 2744 ашигт малтмалын тусгай зөвшөөрөл байгаа бөгөөд үүний тэн хагас нь буюу 1377 нь ашиглалтын, 1367 нь хайгуулын лиценз юм.

Хайгуулын лиценз гэдэг тухайн бүс нутаг дээр геологийн хайгуул хийх зөвшөөрөл бөгөөд олборлож, экспортлохоос бусад үйл ажиллагааг ерөнхийд нь зөвшөөрдөг.

Хайгуулын лицензүүд газар нутгийн хувьд харьцангуй том байдаг. Ашигт малтмалын зөвшөөрөл олгогдсон нийт газар нутгийн 90.5% нь хайгуулын лиценз юм.  Ашиглалтын лиценз эзэмшихийн тулд эхлээд заавал хайгуулын лиценз эзэмших ёстой ба тухайн газар нутаг дээрээ хайгуулын ажил хийж түүнийгээ баталгаажуулж байж ашиглалтын лиценз болгодог.

Ашигт малтмалыг олборлоод экспортлохын тулд хайгуулын лицензээ заавал ашиглалтын лиценз болгох ёстой. Ашиглалтын лиценз эзэмшигч байгууллага Монгол улсаас аливаа төрлийн эрдэс экспортлох эрхтэй болдог гэсэн үг.

За ингээд хэний засгийн газрын үед хичнээн ашигт малтмалын лиценз олгогдож байсныг бүгдээрээ харцгаая.

Эх сурвалж: mram.gov.mn