Өнөөдөр УИХ-ын гишүүн Ч.Хүрэлбаатар ирэх оны төсөвтэй холбоотой, ноцтой мэдээлэл өглөө. Тэрээр ирэх онд Монгол Улс өнгөрсөн хугацаанд авсан бүх зээлийнхээ хүүнд 963 тэрбум төгрөг төлнө гэв. Харин үндсэн зээлийн төлбөрт 2 их наяд 400 тэрбум төгрөг төлөх юм байна. Эдгээр нь нийлээд 3.4 их наяд төгрөг болно. Гэтэл ирэх онд манай улс нийтдээ 6.9 их наяд төгрөгийн орлого олохоор тооцоолж, үүнийхээ талыг буюу 3 их наяд төгрөгөө зээлд зарцуулах болж байна.

Гэтэл орлогын нөгөө тал дахь зарлага маань цаасан дээр 7 их наяд давчихсан. Бодит байдалд бол ердөө 4 их наяд төгрөг байх дүр зураг тодроод явчихлаа.    

Хамгийн хачирхалтай нь бид төсөв батлахын урд өдөр л ирэх онд төлөх зээлийн хэмжээгээ сөрөг хүчнийхнээс олж мэдэж байна. Учир нь Монголд өрийн удирдлагын менежмент одоог хүртэл байхгүй.

Уг нь өнгөрсөн онд Монголбанк “Төрөөс мөнгөний бодлогын талаар 2015 онд баримтлах үндсэн чиглэл батлах тухай” УИХ-ын тогтоолын төсөлд энэ талаар онцлон дурджээ. Өөрөөр хэлбэл Засгийн газарт өрийн удирдлагын менежмент боловсрууулан, мөрдөх үүрэг өгсөн. Энэ дагуу Сангийн яам Монгол Улс дотоод, гадаад өрөө ямар хугацаанд, хэрхэн яаж төлж барагдуулах төлөвлөгөө боловсруулжээ. Төлөвлөгөөг Засгийн газрын хуралдаанаар ч хэлэлцэж. Харин батлаагүй гэнэ.

Иймд Сангийн яам батлагдаагүй гэдэг нэрийдлээр олон нийтэд мэдээлэлгүй өдийг хүрлээ. Нөгөөтэйгүүр өнөөдрийн мэдэгдэл өрийн удирдлагын менежментээ боловсруулан, эртнээс өрийн асуудлаа шийд гэсэн УИХ-ын тогтоол ч хэрэгжээгүйг давхар харууллаа.

Маргааш үдээс хойш УИХ хуралдана. Гэхдээ өрийн удирдлагын менежментгүйгээр энэ оны төсвийн тодотгол болон ирэх оны төсвийг хэлэлцэх юм.

Гэрэл зургийг Б.Бямба-Очир