Гаальд дахиад л халгаа сэлгээ хийгдэх бололтой. Нэн түрүүнд Замын-Үүд дахь гаалийн даргын суудал ганхаж эхэлсэн байна.
Гаалийнхан нэгдүгээр сарын 27-ны ням гарагт хуралдсан гэнэ. "Азийн чоно" компани метилийн спиртээр архи үйлдвэрлэснээр олон хүний аминд хүрээд буй. Энэхүү спиртийг хилээр нэвтрүүлсэн гаалийн албан тушаалтнууд түрүүчээсээ хариуцлага тооцогдоод буй билээ. Ингэж шуурхай хуралдаан эхлүүлэхийг бодоход гаалийнхан халгаа сэлгээний ажил нэлээд хийх нь тодорхой боллоо.

Бид энэхүү мэдээллийн дагуу Замын-Үүдийн гаалийн газар луу холбогдсон бөгөөд дарга нар бүгд эзгүй байлаа. Хот руу ажлаар явсан гэх мэдээлэл сонссон юм. Замын-Үүдийн гаалийн дарга Цэнгэлтэй өөртэй нь холбогдохыг хүссэн боловч холбогдож чадаагүй юм. Ингээд орлогч дарга Батчулуунтай холбогдож энэ талаар тодрууллаа.

-Замын-Үүдийн гаалийн даргыг огцруулах гэж байгаа гэж сонслоо. Ямар учиртай юм бэ?
-Манай дарга өөрөө огцрох өргөдлөө өгсөн юм.

-Цэнгэл дарга яагаад албан тушаалаа өгөх болов?
-Нарийн зүйлийг би сайн мэдэхгүй. Хоёр, гурван жилийн өмнө орж ирсэн спиртийн хэрэгтэй л холбоотой л юм шиг байна лээ.

-Тийм үү. Энэ спиртийн хэрэг нь ямар хүмүүстэй холбоотой юм бол...
-Би мэдэхгүй ш дээ. Одоогоор энэ хэргийг цагдаагийнхан шалгаж байгаа юм билээ. Аяндаа шийдэгдээд гараад ирэх байлгүй.

-Цэнгэл даргын оронд ямар хүн сонгогдох бол...
-Ёстой мэдэхгүй. Хуралдаж л байгаа байх.

-Мягмар гэж хүний нэр дуулдаж байна...
-Ямар ч байсан нэг хүн сонгогдох байлгүй дээ.

Юутай ч орлогч даргын мэдээлэл ийм байна. Ням гарагийн шуурхай хуралдаанд Сангийн сайд Ч.Улаан ирсэн сураг гарсан. Замын-Үүдийн гаалийн даргын суудалд нэр нь дэвшигдээд буй Мягмар гэгчийг Гаалийн Ерөнхий Газрын дарга Цэвээнжав, сайд Улаан нарын халаасны хүн гэх ч мэдээлэл байна. Ямар ч байсан ГЕГ-ын дарга Цэвээнжав хотын гаалийн газрын дэд дарга болон бусад хэд хэдэн албан тушаалтныг солих саналтай байгаагаа хурлын үеэр хэлсэн сурагтай.