Улаанбаатар хотын шинэ нисэх буудал барих төсөл дуусахад 480 хоног үлдээд байна. Төсөл хэрэгжүүлэх нэгжээс мэдээлж байгаагаар энэ он төслийн оргил үед тооцогдож байна.

2015 оны эцэст ажлын гүйцэтгэлийг 65.8 хувьд хүргэх зорилтыг тавин нарийвчилсан, шахуу графикаар ажиллаж байгаа юм байна. Есдүгээр сарын 11-ний өдрийн байдлаар барилгын ажлын явц 56.8 хувьтай байгаа аж.

Энэ нь төлөвлөгөөт гүйцэтгэлийг 3.6 хувиар давуулан биелүүлсэн үзүүлэлт болж байна. Одоогоор хөөрч, буух зурвасын ажил бүрэн дууссан төдийгүй буудлын цутгалт дуусч, дотоод заслыг эхлүүлэх ажил эхэлжээ. Мөн цахилгаан, механик, харилцаа холбоо, аюулгүй байдал, хамгаалалтын систем, инженерийн шугам сүлжээний ажил, ус чийгнээс хамгаалах, галаас хамгаалах системийн ажил зэрэг хийгдэж байна.

Шинэ нисэх буудлын төслийн хувьд төсөл эхэлсэн 2013 оноос хойш ажлын графикаа давуулан биелүүлж байгаа ажээ. Хамгийн сүүлд зөвлөх үйлчилгээ үзүүлж буй Японы “Азуса сэккей”, “Ориентал консалтантс глобал” компаниудын түншлэл болон ИНЕГ-ын хооронд 2009 онд анх байгуулж байсан “Зөвлөх үйлчилгээний гэрээ” шинэчлэгдэж, тус гэрээнд гарын үсэг зурах ёслол есдүгээр сарын 11-ний өдөр болжээ.

Энэхүү түншлэл нь төслийн зураг төслийг 2011 онд боловсруулсан бол энэ удаад барилга угсралтын ажил, тоног, төхөөрөмж суурилуултад техникийн хяналт хийж байгаа юм. Өнөөдрийн байдлаар барилгын талбай дээр 2100 гаруй ажилчин, инженер, өдөрт 220 гаруй машин, техник ажиллаж байна.