Улсын хэмжээнд энэ жил нийт 512.3 мянган га талбайд тариалалт хийж, ургацын урьдчилсан балансаар 265 мянган тонн үр тариа, үүнээс 252,3  мянган тонн буудай, 117.3 мянган тонн төмс, 75.3 мянган тонн хүнсний ногоо хураан авахаар тогтоогоод байгаа аж.

Өнгөрсөн тавдугаар сард хүйтэн сэрүү, хур тунадас багатай байснаас гадна зуны эхэн сард өдөр, шөнийн температурын хэлбэлзэл ихтэй, олон хоног аагим халуун үргэлжилж, хур бороо багатай байснаас болж гангийн нөхцөл байдал үүссэн.

Ялангуяа таримал ургамлын хамгийн эмзэг үе болох зургадугаар сарын 10-аас долдугаар сарын 8-ны хооронд тариалангийн гол бүс нутгаар агаарын температур дээд тал нь 34-38 хэм, хөрсөн дээрх температур 60-64 хэм хүрч халсан нь ургамлын ургалт, өсөлтөд сөргөөр нөлөөлжээ.

Үүний улмаас улаан буудайн 49.9 мянган га талбайд ургац алдаж, 32.5 мянган га талбай тэжээлд шилжсэнээр төлөвлөсөн ургацынхаа 53.7 хувийг, хэрэгцээт гурилын 58.2 хувийг хангах хэмжээний буудай авах төлөв гаргасан байна.

Ингээд ургац хураалтын ажилтай холбогдуулан дараах арга хэмжээг авч хэрэгжүүлжээ:

• БНХАУ-ын Засгийн газрын хөнгөлөлттэй зээлийн хөрөнгөөр 125-165 морины хүчтэй 132 трактор, үр тарианы 51 комбайн авч 20 хувийн урьдчилгаатай таван жилийн дотор эргэн төлөх нөхцөлтэйгөөр зээлээр олгох ажил хэрэгжүүлж эхэлсэн.
• Сонгон шалгаруулалт явуулж нийт 21 аж ахуй, нэгжид өндөр хүчин чадлын трактор, үр тарианы комбайн, үрлэгчийн иж бүрдлийг худалдан авахад зориулж 7.5 тэрбум төгрөгийн зээлийн дэмжлэг үзүүлсэн.
• Үр тариа хадгалах 36 мянган тоннын багтаамжтай төмөр бетон элеваторыг Дархан-Уул аймагт ашиглалтад оруулсан.

Харин гурилын балансын хувьд нийтдээ 252.3 мянган тонн буудай үтрэм дээр бууж, цэвэр жингээр 241.4 мянган тонн буудай зарцуулагдах төлөвтэй байгаа юм байна.

Гурилын үйлдвэрлэлд зориулан 186.2 мянган тонн буудай нийлүүлэх төлөвтэй байгаа бөгөөд нийтдээ 213.6 мянган тонн буудайн нөөц бүрдэх аж. Монгол улсын жилийн хэрэгцээт гурилыг дотооддоо үйлдвэрлэхэд 320 мянган тонн улаан буудай шаардлагатай бөгөөд дээрх тоо баримтаас үзэхэд 2015-2016 оны хэрэгцээнд 106.4 мянган тонн буудай дутагдах төлөвтэй байгаа юм.

Мөн ургац хураалтын ажлыг технологийн хугацаанд шуурхай зохион байгуулах, шаардагдах шатахуун болон ажиллах хүн, хүчний асуудлыг холбогдох мэргэжлийн байгууллагуудтай хамтран шийдвэрлэхээр ажиллаж байгаа аж.