1870 оны дөрөвдүгээр сарын 22-ны өдөр Симбирск хотод ардын боловсролын газрын шинжээч Илья Николаевичний гэрт мэндэлсэн хүүг 1917 оны хувьсгалыг эхлүүлнэ гэж хэн ч мэдээгүй. Хүүг 17 настай байхад том ахыг нь эзэн хааны аминд хүрэх гэж байсан гээд ялын дээд хэмжээ өгсөн нь хаант засгийг үзэн ядах сэдэл төрүүлнэ ч гэж мэдээгүй.

Оросын сүүлчийн эзэн хааны гэр бүлийг буудан хороох тушаал өгнө гэдгийг хоёрдугаар Николай өөрөө ч төсөөлөөгүй нь мэдээж. Гэхдээ дээр дурдсан гурван өгүүлбэрт бичигдсэн бүхэн болоод өнгөрснийг түүх гэрчилнэ.

Ялангуяа эхний хоёр өгүүлбэрт эргэлзэх хүн үгүй. Харин сүүлчийн өгүүлбэрт бичсэнээр эзэн хааны гэр бүлийг хөнөөх тушаал өгсөнд зарим нэг эргэлзээ бий. Учир нь В.Н.Соловьёвын саяхны судалгаагаар Ленинийг эзэн хааны гэр бүлийг устгах тушаал өгсөн гэх ямар ч баримт байхгүй гэжээ.

Гэхдээ энэ бүхнийг умартаад хөшөөний тухай ярианд оръё. Өнөөдөр Улаанбаатар хотод В.И.Лениний хөшөө сүндэрлэж байгаа газар байхгүй. Гэхдээ бас байгаа. Пролетарийн хувьсгалын удирдагч түүнийг багад нь Володя Ульянов гэдэг байв.

Юу гэхээр өөрийгөө хувьсгалын үед Ленин хэмээн нэрийдсэн “Сур, сур бас дахин сур” гэдэг үгийг айлдагч эрхэм Ульянов гэдэг нэртэй байсан хэрэг. Тийм ч учраас өнөөдөр Улаанбаатар хотод Ульяновын хөшөө байхаас Лениний хөшөө байхгүй.

Анх “Пионер сурагчдын сургалт үйлдвэрлэлийн төв” нэртэй байгуулагдсан одоогийн Хүүхдийн урлан бүтээх ордны өмнө зогсож байгаа түүний хөшөөний талаар 1958 онд барилгатай зэрэгцэн баригдсан болов уу, гэхээс өөр мэдээлэл үгүй аж.

Өнгөрсөн зуунд дэлхийн олон оронд Лениний бараг 200 гаруй хөшөө сүндэрлэж байснаас хамгийн олон нь Беларусь, ОХУ-д баригдаж байжээ. Гэхдээ ЗХУ задрахтай зэрэгцэн 1991 онд маш олон хөшөөг нь хүн төрөлхтөн буулгасан аж.

Түүнчлэн Кыргызстаны бараг бүх хот тосгодод түүний хөшөө байдаг гэнэ.