Баянзүрх дүүргийн нутаг дэвсгэрт буюу Нийслэлийн зүүн талаас хот руу орж ирэх замд хоёр банхар, нэг арслангийн хөшөө буй. Зарим хүмүүс энэхүү гурвалсан хөшөө, өндөрлөгийг бүгд банхар гэж ойлгодог учраас энэ удаад онцлохоор шийдлээ.

Үнэнийг хэлэхэд би ч гэсэн тэр зарим хүмүүсийн нэг нь юм. Баянзүрхийн товчооноос орж ирэх тоолондоо харж байсан хөшөөг “Яасан сүрлэг банхарын хөшөө вэ” гэж харж байснаас голын өндөрлөг дундах нь арслан гэдгийг мэдээгүй явжээ.

Энэхүү арслан нь Баянзүрх хайрханы эзэн Баян Намсрай бурханы хүлэг араатны хаан “Ар” цагаан арслан гэгчийг дүрсэлсэн хэрэг байж. Тиймийн учир хөх тэнгэр, эх дэлхий, лус хангай гурван цагийн эргэлтэд үргэлж ариун дагшин, унаган төрхөөрөө байж ард иргэд нь айх аюулгүй, шаналах зовлонгүй хангалуун чинээлэг байхын ерөөл бэлгэдэж бадамлянхуа цэцгэн дээр ургах нарны зүгт харуулан барьжээ.

Өндөрлөг рүү гарах шатыг нь 29 ширхгээр хийсэн нь өсөж хөгжихийн дэвшлийг илэрхийлсэн бөгөөд бүгдийг сувдан цагаан гантигаар бүтээсэн юм байна. Харин хоёр талд нь байх ноход нь Монгол хүний голомтын үнэнч сахиус болох домогт Асар, Басар хоёр бөгөөд хоёр замын хоточ  болгон бариулжээ.

Түүнчлэн Өндөрлөгийн байршил нь орчин үеийн нэршлээрээ тун ч бэлгэшээлтэй. “Нарны зам”, “Ургах наран хороолол”, “Энх тайваны өргөн чөлөө”-ний гурван уулзвар дээр баригдсан бөгөөд өнгөрсөн, одоо, ирээдүйг бэлгэдэж байгаа аж.