Нийгмийн эрүүл мэндийн хүрээлэн малчдын ахуй амьдрал, эрүүл мэндийн нөхцөл байдлын талаар хийсэн судалгаагаар хоёр малчин тутмын нэг нь таргалалттай байна.

Сүүлийн 5 жилд улс орны хөгжил дэвшил, нийгмийн өөрчлөлт, байгаль цаг уур зэрэг хүчин зүйлтэй холбоотойгоор малчдын тоо 22.6 хувиар буурчээ.

Малчдын ахуй амьдралын нөхцөл нь техник, технологийн хөгжил, нийгэм, эдийн засгийн байдлаас хамааран сайжирч байгаа хэдий ч төв суурин газрын иргэдтэй харьцуулахад ихээхэн ялгаатай байгаа тул өнгөрсөн онд энэ судалгааг явуулсан байна.

Малчдын ахуй амьдрал, эрүүл ахуйн нөхцөл, эрүүл мэндийн байдлыг судлаж, цаашид улс, аймаг орон нутгийн хэмжээнд авч хэрэгжүүлэх арга хэмжээний үндэслэл, санал, зөвлөмж боловсруулахад судалгааны зорилго оршиж байгаа аж.

Судалгааны зарим мэдээллээс дурдвал:

Малчдын 62 хувь нь амьжиргааны баталгаажих түвшнээс бага орлоготой, орлогын эх үүсвэрийн 43.1 хувийг  малын түүхий эд зарж борлуулсан орлогоос олдог хэдий ч 75.1 хувь нь малын ашиг шимээс тогтмол орлого олдоггүй гэжээ.

Мөн судалгаанд хамрагдагсдын

• 41.4 хувь нь 7 хоногт нэг удаа,
• 43.1 хувь нь 14 хоногт нэг удаа,
• 14.6 хувь нь сард нэг удаа усанд ордог ба тэдгээрийн дийлэнх нь буюу 91 хувь нь гэртээ ус халааж ордог байна.

Ариун цэврийн байгууламжийн хувьд малчдын зөвхөн

• 3.2 хувь нь стандартын жорлонд,
• 53.1 хувь нь нүхэн жорлонд,
• 43.7 хувь нь ил задгай газар бие засдаг байна.

Эх сурвалж: Нийгмийн эрүүл мэндийн хүрээлэн