Тэсвэр хатуужлын шалгуур-триатлоны Улсын аварга шалгаруулах тэмцээн энэ сарын 17-19-нд Архангай аймгийн Өгийнуурт амжилттай боллоо. Анхны УАШТ-ий 10 жилийн ойн дээр явагдсан тус тэмцээн Монголын хэмжээнд анх удаа триатлончид бүтэн зайд өрсөлдсөнөөрөө онцлогтой болсон юм.

Тэмцээний эрэгтэй элит ангилалд (1000 метр сэлэх, 28 км дугуй жийх, 9,2 км гүйх) Хилчин спорт хороо, Хилийн цэргийн 0164-р ангийн тамирчин, спортын мастер Хишигбатын Одгэрэл ширүүн хүйтэн бороон дунд гайхалтай ялалт байгуулав. Тэрээр дугуйн уралдаан дуусах үед тэргүүлэгчдээс 6 минут 30 секунд хоцорч дөрөвдүгээрт явсан ч гүйлтийн эхний 3 км-тээ өмнөх тамирчдыг барьж, 2 цаг 8 минутын амжилтаар түрүүлсэн. Харин мөнгөн медалийг Хангарьд клубийн тамирчин, спортын мастер Чулуунсүхийн Гансүх, хүрэл медалийг Каннондэйл Монголиа багийн тамирчин, спортын дэд мастер Ноожийн Оргил нар зүүсэн.

Эмэгтэй элит ангилалд Хангарьд клубийн залуу тамирчин Түвшинтөгсийн Хүслэн гурав дах жилдээ дараалан түрүүлж Монгол Улсын спортын мастер цолны болзлыг 17-хон насандаа биелүүлсэн байна. Мөнгө, хүрэл медалийг Хангарьд клубийн тамирчин, спортын дэд мастер Эрдэнэбилэгийн Сүрэнням, Эрдэнэбатын Уянга нар хүртсэн юм.

Мөн хөвгүүд, сонирхогчдын насны ангилалтай уралдаан тун сонирхолтой болж 40 шахам тамирчин хурд сорин оролцжээ.

Эх сурвалж: