"Фантастик продакш”-ны бүтээл “37-р Точка” олон ангит киноны төгсгөлийн ангийн албан ёсны онлайн нээлт дөрөвдүгээр сарын 6-ны өдөр болно.

Онлайн нээлт хийсэн эхний гурван өдөр SkyGO-ийн хэрэглэгчид хямдралтай үнээр үзэх боломжтой бөгөөд дөрөвдүгээр сарын 10-наас хойш SkyGO болон Skymedia-гаар үндсэн үнээр нь үзэх юм байна. 

Нэг кодоор тухайн захиалсан хоногтоо буюу 24 цагийн хугацаанд үзэх бөгөөд хоёр өөр төрлийн төхөөрөмжөөр үзэх боломж нээлттэй байх аж.

Шинэ коронавирусийн халдвартай холбоотойгоор Улсын Онцгой комиссоос гаргасан өндөржүүлсэн бэлэн байдлын хэсэгчилсэн зэрэгт шилжүүлсэн өдрийг дөрөвдүгээр сарын 30-ныг хүртэл сунгасан.

“37-р Точка” киноны төгсгөлийн ангийг бүрэн хэмжээний уран сайхны кино хэлбэрээр бүтээсэн бөгөөд цаг үеийн нөхцөл байдалтай холбоотойгоор онлайнаар үзэх боломжтой болгожээ.

Албан ёсны нээлтийг халдварын тархалтыг буурсны дараа буюу намар кинотеатрт хийхээр төлөвлөж байсан ч үзэгчдийн хүлээлт болон хорио цээрийн дэглэмийг тооцон үзэж онлайн нээлтийг анх удаа туршиж үзэж байгаа гэдгийг тус продакшныхан хэлсэн юм.

“37-р ТОЧКА” киноны төгсгөлийн ангийг үзэхийн тулд www.37tochka.mn вебсайтаас тасалбар захиалж, захиалгын кодоо SkyGO-р орж баталгаажуулснаар хаанаас ч үзэх боломжтой болох юм байна.