10 минутын дараа хэсгийн барилдаанууд эмэгтэйчүүдийн -63 кг, -70 кг болон эрэгтэйчүүдийн -73 кг-ийн барилдаанаар эхлэх гэж байна. Та бүхэн Буянт Ухаа Спортын ордонд хүрэлцэн ирж Монгол бөхчүүдээ дэмжээрэй.

Гэрэл зургийг Д.Жавхлантөгс

"Чингис хаан" Гранпри тэмцээний мэдээллийн спонсор GoGo news agency

                                 "Чингис хаан" Гранпри тэмцээний мэдээллийг ЭНД-ээс үзнэ үү.

Монголын жүдоч Ц.Батцэцэг, Японы жүдоч Эрин Ике нар -70 кг-ийн жинд барилдаж байна.

Татами 3 дээр БНХАУ-ын жүдоч Чиндаогийн Гранпригийн хүрэл медальт Цуижуан Ши, БНСУ-ын жүдоч Чежүгийн Гранпригийн мөнгөн медальт Ким Сеүлги нар -63 кг-ийн жинд барилдаж байна.

"Чингис хаан" Гранпригийн хоёр дахь өдөр эхэллээ. Эрэгтэй -73кг-д Европын нээлттэй тэмцээний хүрэл медальт Узбекистаны жүдоч Бобоев Гиосжон Чекийн Жекминек Жакуб жүдочтой барилдаж, 1 минутанд цэвэр яллаа. 

-70 кг-ийн жинд барилдсан Ц.Батцэцэг торгууиар ялагдлаа. 

Эмэгтэй -70 кг-д М.Даваасүрэн, Азийн аваргын шагналт байрт орж байсан Казахстаны жүдоч Кударова Динаратай барилдаж өрсөлдөгч нь гэмтсэн учир Монголын жүдочид цэвэр ялалтыг өглөө.

Шведийн Макиас Томми Японы Той Такешитэй учраа таарлаа. Япон жүдоч өрсөлдөгчөө таван минутанд вазари үнэлгээгээр буулган авлаа. 

Такеши үүний дараа Монголын жүдоч С.Ням-Очиртой учраа таарна. 

-63 кг-д Азийн өсвөрийн аваргын хүрэл медальт Казахстаны жүдоч Мариан Урдабаева, БНХАУ-ын жүдоч Лиу Сиюг цэвэр яллаа.

-70 кг-д Б.Хонгорзул, Анголийн жүдоч, Африкийн аварга Антонио Морейратай барилдаж байна.

-63 кг-д Монголын жүдоч Ш.Ганчимэг, АНУ-ын жүдоч Ташкентийн Гранпригийн мөнгөн медальт Ханна Мартинтай барилдаж байна.

Казахстаны жүдоч Хамза Дидар -73кг-д Норвегийн жүдоч Дивлин Мартинтэй барилдлаа. 

Хамза Дидар 3 минут 45 секундэд өрсөлдөгчөө цэвэр яллаа. 

Казахстаны жүдоч үүний дараа Х.Цагаанбаатартай учраа таарна.

Азийн залуучуудын аваргын хүрэл медальт Б.Бат-Эрдэнэ -81кг-д Европын нээлттэй тэмцээний хүрэл медальт Сербийн тамирчин Маждов Неманятай барилдаж байна.

-70 кг-д барилдсан Б.Хонгорзул, Анголийн жүдоч Антонио Морейрад цэвэр ялагдлаа.

-63 кг-д АНУ-ын жүдоч, Ташкентийн мөнгөн медальт Ханна Мартинтай барилдсан Ш.Ганчимэг харамсалтайгаар ялагдлаа.

-63 кг-д Б.Баасанжаргал, 2014 оны Тюмены их дуулгын хүрэл медальт Австрийн тамирчин Хилде Дрекслертэй барилдаж байна.

Сербийн жүдоч Маждов өрсөлдөгчөө таван минутад торгуулиар яллаа.

Азийн наадмын мөнгөн медальт, Чиндао, Абу Дабигийн Гранпригийн хүрэл медальт Г.Одбаяр -73кг-д 2014 оны Киргиз улсын аварга, Челябинскт болсон Дэлхийн аваргад Монголын жүдоч Ц.Цагаанбаатартай учраа тааран барилдаж ялагдаж байсан Жаныбек уулу Руслантай барилдаж байна.

-63 кг-д барилдсан Б.Баасанжаргал 3:05 секундэд, Австрийн жүдоч Хильде Дрекслерт ялагдлаа.

-70 кг-д Японы жүдоч Эрина Ике, Азийн аваргын алтан медальт БНСУ-ын жүдоч Хуан Иэ Сүлтэй барилдаж байна.

Японы жүдоч Эрина Ике -70 кг-д БНСУ-ын жүдоч Хуан Ие Сүлийг яллаа.

Г.Одбаяр өрсөлдөгчөө таван минутад торгуулиар яллаа.

-63 кг-д барилдсан Африкийн өсвөрийн аваргын алтан медальт Мороккогийн жүдоч Ризлен Зуок, Японы жүдоч Европын нээлттэй тэмцээний мөнгөн медальт Михо Минейд ялагдлаа.

-63 кг-д Бакугийн их дуулгын алтан медальт Францын жүдоч Анне Лауре Беллард, 2013 оны Улаанбаатар Гранпригийн алтан медальт Ц.Цэрэннадмидтай барилдаж байна.

-70 кг-д М.Даваасүрэн, БНХАУ-ын жүдоч, Азийн өсвөрийн аваргын хүрэл медальт Чао Жоутой барилдаж байна.

-73кг-д Германы жүдоч Вандтке Игор Хятадын жүдоч Сайтай учраа таарав. 

Хятадын жүдоч 3 минутад торгуулиар өрсөлдөгчөө буулган авлаа. Сануулахад Хятадын жүдочын дасгалжуулагч нь Х.Болдбаатар юм. Тэрбээр өмнө нь Монголын шигшээгийн дасгалжуулагчаар ажиллаж байсан. 

2013 оны Улаанбаатар Гранпригийн алтан медальт Ц.Цэрэннадмид -63 кг-д, Бакугийн их дуулгын алтан медальт Францын жүдоч Анне Лауре Беллардыг цэвэр яллаа.

- 63 кг-д Азийн өсвөрийн аваргын алтан медальт Ц.Мөнхзаяа, Африкийн өсвөрийн аваргын хүрэл медальт Камеруны жүдоч Элень Везеү Домбеүтэй барилдаж байна.

-70 кг-д Монголын жүдоч Б.Хулан, БНХАУ-ын жүдоч Чиндаогийн Гранпригийн алтан медальт Фей Чентэй барилдаж байна.

Мастерс тэмцээний хошой алтан медальт С.Мияарагчаа -73кг-д Залуучуудын Азийн аваргын хүрэл, Европын нээлттэй тэмцээний алтан медальт Японы жүдоч Хашимото Сойчитэй таарлаа.  Мастерсын хошой аварга С.Мияарагчаа цэвэр яллаа. 

- 63 кг-д Ц.Мөнхзаяа, Африкийн өсвөрийн аваргын Камеруны жүдоч Элень Везеү Домбеүг нэмэлт цагт юкөгөөр яллаа.

Лондонгийн олимпийн хүрэл медальт С.Ням-Очир -73кг-д Японы жүдоч Дой Такешитэй барилдаж байна. 

2013 оны Улаанбаатар Гранпригийн мөнгөн медальт О.Ууганбаатар, Африкийн нээлттэй тэмцээний хүрэл медальт Францын жүдоч Жулиан Керммаректэй барилдаж байна.

Олимпийн хүрэл медальт С.Ням-Очир таван минутад торгуулиар Японы жүдочийг буулган авлаа. 

Рио Де Жайнерогийн 2013 оны дэлхийн аваргын шагналт байрт орж байсан О.Ууганбаатар, Африкийн нээлттэй тэмцээний хүрэл медальт Францын жүдоч Жулиан Кермаррекийг яллаа.

Олимпийн хүрэл медальт, дэлхийн аварга Х.Цагаанбаатар -73кг-д Казахстаны жүдоч Хамка Дидартай барилдахаар дэвжээнд гарч ирлээ. 

Бакугийн их дуулгын аварга Австрийн жүдоч Кетрин Унтервүрзахер, 2013 оны Ташкентийн Гранпригаас мөнгөн медаль хүртэж байсан АНУ-ын жүдоч Ханна Мартинийг ялж хэсгээсээ гарлаа.

- 63 кг-д 2013 оны Улаанбаатар Гранпригийн аварга Ц.Цэрэннадмид, Астанагийн Гранпригийн мөнгөн медальт Шведийн жүдоч Анна Берхолмыг цэвэр яллаа.

Олимпийн хүрэл медальт жүдоч Х.Цагаанбаатар -73кг-д Казахстаны жүдоч Хамза Дидарыг торгуулиар яллаа. 

Азийн өсвөрийн аварга Ц.Мөнхзаяа -63 кг-д хэсгийн аваргын төлөө БНСУ-ын жүдоч Хий Жү Ханд ялагдлаа. 

- 81 кг-д барилдсан Монголын жүдоч Н.Баатархүү, Чиндаогийн Гранпригийн хүрэл медальт Робин Пасект цэвэр ялагдлаа.

Лондонгийн олимпийн аварга Мансур Исаев -73кг-д Ганын жүдоч Нарти Эмманультэй барилдаж байна.

Олимпийн аварга Мансур Исаев өрсөлдөгчөө цэвэр ялалтаар буулган авлаа.

Түүний дараагийн өрсөлдөгч Х.Цагаанбаатар юм.

Азийн тивийн аварга Ц.Мөнхзаяа -63 кг-д торгуулийн барилдаанд Астанагийн Гранпригийн мөнгөн медальт Шведийн жүдоч Анна Берхолмтой барилдаж, юүкогоор ялагдлаа.

- 63 кг-ийн хагас шигшээд Европын нээлттэй тэмцээний мөнгөн медальт Михо Миней, Бакугийн их дуулгын аварга Кетрин Унтервүрзахертай барилдаж байна.

-81кг-д Челябинксод болсон дэлхийн аваргын мөнгөн медальт Канадын жүдоч Антони Майамигийн Гранпригийн алтан медальт Их Британийн жүдоч Рид Томтой барилдлаа.

Канадын жүдоч өрсөлдөгчөө торгуулиар буулган авлаа.

Японы жүдоч Михо Миней өрсөлдөгчөө цэвэр ялж, одоо дэвжээн дээр Азийн аваргын хүрэл медальт Ц.Цэрэннадмид, БНСУ-ын жүдоч Хий Жү Хантай барилдаж байна. Хоёр бөхийн ялсан нь алтан медалийн төлөө хүч үзнэ.

Азийн наадмын хүрэл медальт, Чежү, Тбилисигийн Гранпригийн хүрэл медальт Н.Дагвасүрэн -81кг-д Хятадын жүдоч Ери Хэмубатутай барилдахаар дэвжээнд гарч ирлээ.

2013 оны Улаанбаатар Гранпригийн аварга Ц.Цэрэннадмид, БНСУ-ын жүдоч Хи Жү Ханыг ялж Японы жүдоч Михо Минейтэй алтан медалийн төлөө хүч үзэхээр боллоо.

Монголын жүдоч Н. Дагвасүрэн өрсөлдөгчөө Хятадын жүдоч Ери Хэмубатуг цэвэр яллаа.

Мастерс тэмцээний хошой алтан медальт С.Мияарагчаа -73кг-д Европын нээлттэй тэмцээний хүрэл медальт Узбекистаны жүдоч Бобоевтой барилдахаар дэвжээнд гарч ирлээ.

Хоёр жүдочийн ялсан нь хэсгийн аварга болно.

- 81 кг-д 2013 оны дэлхийн аваргын шагналт байрт О.Ууганбаатар, Бакугийн их дуулгын хүрэл медальт ХБНГУ-ын жүдоч Доминик Ресселд ялагдан хэсгээсээ гарсангүй. Гэхдээ торгуулийн барилдаанд ялбал хүрэл медалийн төлөө барилдах эрхтэй болно. Амжилт хүсье.

- 70 кг-ийн торгуулийн барилдаанд Японы жүдоч Эрина Ике, Африкийн аварга Анголийн жүдоч Антонио Морейрад ялагдлаа.

С.Мияарагчаа Узбекистаны жүдоч Бобоевийг торгуулиар ялж, хэсгийн аварга боллоо. 

Азийн наадмын мөнгөн медальт, Чиндао, Абу Дабигийн Гранпригийн хүрэл медальт Г.Одбаяр -73кг-д Хятадын жүдоч Сайтай учраа тааран барилдаж байна. 

-70 кг-д 2013 оны Африкийн аварга Ассмаа Ниан, 2013 оны Чиндаогийн Гранпригийн аварга Чен Фейг ялж хүрэл медалийн төлөө өрсөлдөх эрхтэй боллоо.

Г.Одбаяр Хятадын жүдоч Сайд вазари үнэлгээ алдаж, ялагдал хүлээлээ. Хятадын жүдоч хэсгийн аварга боллоо.

2013 оны Москвагийн их дуулгын аварга Австрийн жүдоч Бернадетте Граф, өнгөрсөн жилийн Чиндаогийн Гранпригийн аварга ХБНГУ-ын жүдоч Илжана Марзокыг цэвэр ялж алтан медалийн төлөө өрсөлдөх эрхтэй боллоо.

Олимпийн хүрэл медальт С.Ням-Очир -73кг-д хэсгийн аваргын төлөө Шиндаогийн Гранпригийн хүрэл медальт Хятадын жүдоч Сун Шуайтай барилдлаа. 

С.Ням-Очир юүко үнэлгээгээр ялж, хэсгийн аварга боллоо.

- 70 кг-д Азийн өсвөрийн аварга БНХАУ-ын жүдоч Чао Жоү, Парисын 2014 оны их дуулгын мөнгөн медальт Францын жүдоч Фенни Эстелийг цэвэр ялж алтан медалийн төлөө өрсөлдөх эрхтэй боллоо.

Дэлхийн аваргын шагналт байрт О.Ууганбаатар, Чиндаогийн Гранпригийн хүрэл медальт Шведийн жүдоч Робин Пасекийг ялж хүрэл медалийн төлөө өрсөлдөх эрхтэй боллоо.

Бакугийн их дуулгын хүрэл медальт Доминик Рессель, Мастерсын хүрэл медальт Унгарын жүдоч Атилла Унгварид цэвэр ялагдлаа. Ийнхүү Унгвари Атилла алтан медалийн төлөө үзэх эрхтэй болж байна.

Олимпийн аварга, ОХУ-ын жүдоч Мансур Исаев, Олимпийн хүрэл медальт Х.Цагаанбаатар нар хэсгийн аваргын төлөө барилдлаа.

Үзэгчдийг дуу алдуулсан  маш өрсөлдөөнтэй барилдаан боллоо. 

Мансур Исаев юүко үнэлгээгээр ялж хэсгийн аварга боллоо. 

- 81 кг-д Азийн наадмын хүрэл медальт Н.Дагвасүрэн, Бакугийн их дуулгын хүрэл медальт Японы жүдоч Гоки Марүямаг цэвэр ялж хэсгээсээ гарлаа.

-81кг-ийн жингийн хэсгийн аваргын төлөө Канадын жүдоч Валойс Фортиер Антоны болон Ираны жүдоч Моллай Сайд нар учраа таарлаа. 

Канадын жүдоч өрсөлдөгчөө торгуулиар ялж, хэсгийн аварга боллоо. 

Азийн наадмын мөнгөн медальт, Чиндао, Абу Дабигийн Гранпригийн хүрэл медальт Г.Одбаяр торгуулийн барилдаанд Узбекистаны жүдоч Бобоевтой барилдлаа. 

Г.Одбаяр өрсөлдөгчөө цэвэр ялж, хүрэл медалийн төлөө өрсөлдөх болзол хангалаа. 

Олимпийн хүрэл медальт Х.Цагаанбаатар -73 кг-ийн торгуулийн барилдаанд БНХАУ-ын жүдоч Шуай Сүнд харамсалтайгаар цэвэр ялагдлаа.

Мастерсын аварга С.Ням-Очир -73 кг-ийн жинд, 2012 оны Лондоны олимпийн аварга Мансур Исаевтай барилдах байсан ч дэвжээнд гарч ирээгүй тул цэвэр ялалт авч алтан медалийн төлөө өрсөлдөх эрхтэй боллоо.

Мастерс тэмцээний хошой алтан медальт С.Мияарагчаа хагас финалд Хятадын жүдоч Сайтай учраа таарлаа. 

Харамсалтай С.Мияарагчаа ялагдлаа. Гэсэн хэдий ч тэрбээр хүрэл медалийн төлөө барилдана.

Азийн өсвөрийн аварга, Ираны жүдоч Саеид Моллаей, Бакугийн их дуулгын хүрэл медальт Гоки Марүяаг давж хүрэл медалийн төлөө барилдах эрхтэй боллоо.

Азийн наадмын хүрэл медальт, Чежү, Тбилисигийн Гранпригийн хүрэл медальт Н.Дагвасүрэн -81кг-ийн хагас финалд Дэлхийн аваргын мөнгөн медальт Канадын жүдоч Антионе Валоис-Фортиертой барилдлаа.

Канадын жүдоч вазари үнэлгээгээр яллаа.  Н.Дагвасүрэн хүрэл медалийн төлөө О.Ууганбаатартай барилдана. 

Ийнхүү хэсгийн барилдаанууд өндөрлөж байна. 17:00 цагаас - 63 кг-ийн хүрэл медалийн төлөөх барилдаанууд эхлэх бөгөөд энэ жинд 2013 оны Улаанбаатар Гранпригийн алтан медальт Ц.Цэрэннадмид, Европын нээлттэй тэмцээний мөнгөн медальт Михо Минейтэй барилдана. Түүнчлэн -73 кг-д манай бөхчүүд хоёр хүрэл, нэг алтан медалийн төлөө хүч үзэх юм. Харин - 81 кг жинд Дэлхийн аваргын шагналт байрт орж байсан О.Ууганбаатар, Инчёны Азийн наадмын хүрэл медальт Н.Дагвасүрэн нар хүрэл медалийн төлөө өрсөлдөхөөр болж байна.

Тюмены их дуулгын хүрэл медальт Австрийн жүдоч Хильде Дрекслер, БНСУ-ын жүдоч Хий Жү Хан нар -63 кг-ийн хүрэл медалийн төлөө өрсөлдөж БНСУ-ын жүдочийн ялалтаар өндөрлөлөө.

Яг одоо Астанагийн Гранпригийн мөнгөн медальт Шведийн жүдоч Анна Берхолм, Бакугийн их дуулгын алтан медальт Кетрин Унтервүрзахер нар -63 кг-ийн хоёр дахь хүрэл медалийн төлөө өрсөлдөж байна.

Мастерсын мөнгөн медальт Австрийн жүдоч Кетрин Унтервүрзахер юүко үнэлгээгээр өрсөлдөгч Шведийн жүдоч Анна Берхолмыг ялж, хүрэл медалийн болзол хангалаа.

2013 оны Улаанбаатар Гранпригийн алтан медаль хүртэж байсан Ц.Цэрэннадмид -63 кг-д Японы жүдоч Михо Минойг вазари үнэлгээгээр ялж, АЛТАН медаль хүртлээ.

- 73 кг-ийн жинд 2012 оны Лондоны олимпийн аварга Мансур Исаев гэмтлийн улмаас тэмцээнээ үргэлжлүүлэх боломжгүй болж, 2014 оны Инчёны Азийн аваргын мөнгөн медальт Г.Одбаяр хүрэл медаль хүртэхээр боллоо.

Мастерсын алтан медальт С.Мияарагчаа, Чиндаогийн Гранригийн хүрэл медальт Шуай Сунд -73 кг-ийн жинд харамсалтайгаар цэвэр ялагдлаа.

- 73 кг-ийн жинд алтан медалийн төлөө Мастерсын аварга С.Ням-Очир, БНХАУ-ын жүдоч Инжиригала Сайтай өрсөлдөж, 3:40 секундэд иппоноор ялагдан, мөнгөн медаль хүртэхээр боллоо.

- 70 кг-д Анголийн жүдоч Африкийн аварга Антонио Морейра, Парисын их дуулгын мөнгөн медальт Францын жүдоч Фенни Эстель Посвитег ялж, хүрэл медаль хүртлээ.

Чиндаогийн Гранпригийн аварга ХБНГУ-ын жүдоч Илжана Марзок, Африкийн аварга Мороккогийн жүдоч Ассмаа Нианийг нэмэлт цаг дээр цэвэр ялж, хүрэл медалийн болзол хангалаа.

Москвагийн Гранпригийн алтан медальт Австрийн жүдоч Бернадетте Граф, Азийн өсвөрийн аваргын хүрэл медальт Чао Жоуг цэвэр ялж алтан медаль хүртлээ.

Азийн өсвөрийн аваргын хүрэл медальт Саеид Моллаей, Бакугийн их дуулгын хүрэл медальт Доминик Ресселийг цэвэр ялж хүрэл медалийн болзол хангалаа.

Яг одоо дэвжээн дээр Чингис хаан Гранпри 2013-ын мөнгөн медальт О.Ууганбаатар, Инчёны Азийн наадмын хүрэл медальт Н.Дагвасүрэн нар хүрэл медалийн төлөө барилдаж байна.

- 81 кг-д Инчёны Азийн наадмын хүрэл медальт Н.Дагвасүрэн, Дэлхийн аваргын шагналт байрт О.Ууганбаатарыг юүкогоор ялж, хүрэл медалийн болзол хангалаа.

- 81 кг-д Дэлхийн аваргын мөнгөн медальт Канадын жүдоч Антоин Валои Фортир, 2011 оны их дуулгын мөнгөн медальт Унгарын жүдоч Аттила Унгвариг ялж алтан медаль хүртлээ.

Ийнхүү өнөөдрийн тэмцээн өндөрлөж, Монголын жүдочид нэг алт, нэг мөнгө, хоёр хүрэл медаль хүртлээ. Хоёр дахь өдрийн байдлаар Монголын баг 15 медаль, зургаан шагналт байртайгаар тэмцээнийг тэргүүлж байна. Маргааш эрэгтэй -90 кг, -100 кг, +100 кг болон эмэгтэй -78 кг, +78 кг жингийн барилдаанууд болно.

Баярлалаа. Маргаашын тэмцээн 12:30 минутад эхэлнэ.