Өнгөрсөн сард буюу тавдугаар сарын 19-нд Засгийн газар, Рио Тинто групп хоорондох хэлэлцээ амжилттай өндөрлөж, талууд далд уурхайн бүтээн байгуулалтыг өрнүүлэх болсноо албан ёсоор зарлалаа. Энэ мэдэгдлийг Дубайд хийсний дараа Оюутолгой ХХК-ийн 66 хувийг эзэмшдэг Туркойз Хилл Ресурс компанийн хувьцааны ханш эрс өссөн. 

Тэгвэл хамгийн сүүлд тус компанийн хувьцаанд нийт долоон компанийн шинжээч зөвлөмж өгчээ. Тэднээс нэг нь “худалдах”, дөрөв нь “хүлээх”, хоёр нь “худалдан авах” гэсэн зөвлөмж өгсөн байна.

Ингэснээр дундаж зөвлөмж нь “хүлээх” гэсэн утгыг заажээ. Шинжээчдийн гаргасан ирэх 12 сарын зорилтот ханшийн дундаж таамаглал 7.3 ам.доллар. Өнгөрөгч улиралд нэг хувьцаанд 0.03 ам.долларын  цэвэр ашиг ногдож байсан бол энэ жилийн эцсээр 0.17 ам.доллар ногдох боломжтой гэж шинжээчид үзжээ.

BMO Capital Markets-ийн шинжээчид нэр дурдсан хувьцааг “худалдан авах”-ыг зөвлөж, зорилтот ханшийг 6.5 ам.доллар гэж таамагласан бол TD Securities-ийн шинжээчид “хүлээх” зөвлөмж өгч, зорилтот ханшийг 5.50 ам.доллар гэж таамаглажээ.

Мөн Bank of America, The Street, Zacks-ийн шинжээчид зөвлөмжөө “худалдах”-аас “хүлээх” болгож ахиулсан бол шинжээчид мөн л “худалдах”-аас “хүлээх” болгож ахиулжээ.

Эдгээр үнэлгээг шинжээчид сүүлийн нэг сарын хугацаанд гаргажээ.

Мэдээллийн эх сурвалж: Гаули үнэт цаасны компани