Өнөөдрөөс бараг долоон жилийн өмнө баригдаж байсан Beatles хамтлагийн хөшөөг хүмүүс олон янзаар ярьж байв. Таалах нэгэн байхад, таалахгүй нэгэн байх нь мэдээж. Гэхдээ Beatles гэдэг хамтлагийг үгүйсгэж огтхон ч болохгүй.

Нэгэнтээ “Хэт Америк” гэж тодорхойлуулж байсан Beatles-ийг Кубад хориглож, дууг нь сонсох эх орноосоо урвасан хэрэг болж байсан түүхтэй

Анх хөшөөний ерөнхий хэлбэр нь гитарын цухуйсан хэсэг мэт харагдаж байсан бол одоо Apple-ийн лого болжээ. Харин хэдэн жилийн турш дээр нь элдэв зүйлс сараачсан хүндэтгэлийн хөшөөг энэ жил дахин будаж сэргээсэн билээ.

Бидэнд ирсэн мэдээллээр “Шар айраг” хамтлагийн гишүүн Г.Ганхүүгийн санаачлагаар, Б.Дэнзэнгийн эх загвараар энэ хөшөөг анх босгож байсан юм байна. 100 гаран сая төгрөгийн санхүүжилтээр босгосон хөшөөний хувьд Азид баригдсан анхны Beatles-ийн хөшөө бөгөөд өнөөдрийг хүртэл Азийн өөр аль нэг улсад алдарт хамтлагийн хөшөө баригдсан тухай мэдээлэл байхгүй.

Ливерпүүлийн дөрвөлийг хөшөөний урд хэсэгт дүрсэлсэн бол нөгөө талд нь гитар барин суух Монгол залуу нь 1970-80-аад оны үеийн Монгол залуусыг төлөөлж байгаа аж.

Сонирхуулахад дэлхий даяар/Ливерпүүлээс гадна/ Beatles хамтлагтай холбоотой дурсгалын талбай, цэцэрлэгт хүрээлэн, хөшөө дурсгалууд дундаас онцлох долоон бүтээл байдаг. Жонн Ленноны багадаа тоглож асан “Гүзээлзгэний талбай”-г төлөөлүүлсэн цэцэрлэгт хүрээлэн түүний амьдралын эцсийн мөчүүдээ өнгөрүүлсэн Нью Йорк хотод бий.

Хамтлагийн түүхтэй салшгүй холбоотой газруудын нэг болох ХБНГУ-ын Хамбург хотод “Beatles Platz” буюу Beatles-ийн талбай оршдог бол Чехийн нийслэл Праг хотод “Жонн Ленноны хана” гэж байдаг аж.

Тэгвэл Исландад Жонн Ленноны хамгийн алдартай бүтээлүүдийн нэг болох “Imagine” дууг бэлгэ тэмдэг болгосон “Imagine Peace” цамхаг бий.

Нэгэнтээ “Хэт Америк” гэж тодорхойлуулж байсан Beatles-ийг Кубад хориглож, дууг нь сонсох эх орноосоо урвасан хэрэг болж байсан түүхтэй. Гэхдээ цаг цагаараа байдаггүй учир Гаванад “Жонн Ленноны Парк” гэгчийг 2000 онд байгуулсан түүх ч бас Кубачуудад бий.

Харин зургаа дахь нь Екатеринбург хотод байрлах “Beatles” хамтлагийн тайзан дээр байгаа дүрсэлж, тоосгон хананд бэхэлсэн ган хөшөө билээ. Тэгвэл ДОЛОО дахь онцлох бүтээлийг та таах гээд үздээ.

Таах гэж бүү яарагтун, зүгээр л энэ нийтлэлийг дахиад эхнээс нь уншаарай.