Монгол улсад аялал жуулчлалын салбарт үйлчилгээ үзүүлдэг, аялуулдаг, бараа бүтээгдэхүүн борлуулдаг байгууллагуудыг нэг цэгээс хэрэглэгчидтэй уулзуулах Үндэсний аялал жуулчлалын “Улаанбаатур” үзэсгэлэнг Мишээл экспо төвд өнөөдөр нээлтээ хийнэ.

Зургадугаар 19-21-ны өдрүүдэд болох тус үзэсгэлэнд Монгол орны 21 аймгийн аялал жуулчлалын газрууд, тусгай хамгаалалттай нутгийн төлөөллүүд, үйл ажиллагаагаараа шалгарсан гэр баазууд, аяллын холбоод, гадагшаа аялуулдаг компаниуд, Шинжлэх ухааны академийн хүрээлэнгүүд, мөн Япон, Болгар, Лаос, Кувейт зэрэг элчин сайдын яамд оролцоно.

“Улаанбаатур” үзэсгэлэн анх удаа болж буй бөгөөд үзэсгэлэнгийн үеэр иргэдэд зориулсан төрөл бүрийн илтгэл, богино хэмжээний сургалт, танилцуулгыг зохион байгуулна.

Тухайлбал аяллын үед гэрэл зураг авах анхан шатны суурь мэдэгдэхүүн олгох, загас барих арга техник заах, үеэр ус, байгалийн аюулаас сэргийлэх сэрэмжлүүлэг, машин техникийн хөнгөн гэмтлийг засахад сургах, ууланд авирахад ямар арга техник хэрэгсэл бүрдүүлэх зэрэг сургалтууд байх аж.