Монголын кино урлагийн хөгжлийг тодорхойлж, чиглүүлэхэд чухал ач холбогдол бүхий "Академийн Дээд Шагнал" гардуулах ёслол хүндэтгэлийн ажиллагаа яг одоо Шангри-Ла зочид буудалд болж байна.

Тав дахь жилдээ уламжлал болгон зохион байгуулагдаж буй энэхүү үйл ажиллагаа нь кино урлагийн салбар дахь ололт амжилтыг 18 номинацаар шалгаруулах юм.

Яг одоо Улаан хивсний ёслол болж байгаа бөгөөд уг наадам

-Улаан хивсний ёслол

-Cocktail буюу хүлээн авалтын ажиллагаа

-Шагнал гардуулах ёслол

-After party гэсэн дараалалтайгаар зохион байгуулагдах юм байна.

2012 он, 2014 онуудад “Шилдэг эрэгтэй гол дүр”-ийн эзнээр тус тус тодорч байсан Жүжигчин Б.Амарсайхан "Энэ жил би уран бүтээл хараахан хийсэнгүй. Харин жүжигчин найз нөхдөө дэмжиж тэднийхээ уран бүтээлийг сонирхохоор ирлээ. Энэ өдөр бол ганцхан миний гэлтгүй Монголын бүх киночдын баяр. "Академийн дээд шагнал" гардуулах ёслолийн ажиллагааг ийм өндөр хэмжээнд зохион байгуулж байгаад баярлалаа" хэмээн сэтгэгдлээ хэллээ.

"Аюултай харилцаа" киноны эрэгтэй шилдэг дүрд дэвшиж буй жүжигчин Э.Мөнхтөр "Наадамд оролцож байгаадаа маш их баяртай байна. Миний хувьд энэ жил хоёр кинонд тоглосон" гэлээ.

Жүжигчин М.Саранцэцэгийн хувь "Хүүхэлдэй" аймшгийн киноны дүрээрээ шилдэг туслах эмэгтэй дүрд нэр дэвшиж байгаа юм.

Тус наадамд шилдэг туслах дүрийн шагналд жүжигчин Э.Алдар "Учрал" киногоороо, жүжигчин О.Дөлгөөн мөн энэхүү киноны дүрээр шилдэг эмэгтэй дүрийн шагналд өрсөлдөж байна. Эдгээр жүжигчин нь анх удаагаа "Academy awards" наадамд оролцож байгаа аж.

Жүжигчин Г.Ундармаагийн хувьд "Academy awards" наадамд хоёр дахь жилдээ нэр дэвшиж байна.

Тэрбээр энэ жил шилдэг найруулагч номинацид "Тютю" бүтээлээрээ өрсөлдөж байна.

"Би ашиг орлого гэхээсээ илүү өөрийн гэсэн өнгө аястай, уран бүтээлч хүний эгэл бүтээл хийе гэж зорьсон" хэмээн улаан хивсний ёслолын үеэр хэллээ.

Улаан хивсний ёслолын ажиллагаа үргэлжилж яг одоо коктэйл хүлээн авалт эхэлж байна.

Тун удахгүй шагнал гардуулах ёслол хүндэтгэлийн ажиллагаа эхлэх гэж байна. Зочид хүндэтгэлийн танхимд орлоо.

"Academy awards-2015" наадмын шагнал гардуулах ёслол хүндэтгэлийн ажиллагаа эхэллээ.

Монголын кино урлагийн 80 жилийн ой тохиож байгаатай холбогдуулан "Academy awards -2015" наадмын шагнал гардуулах ёслолын ажиллагаа 20 дугаар зууны шилдэг кинонуудыг түүвэрлэн оркестрын хамт толилуулж байна.

Ёслолын ажиллагааг нээж Монголын Кино Урлагийн Академийн тэргүүн Б.Цогтбаяр үг хэлж байна.

Шилдэг эрэгтэй дүрийн шагналыг хоёр дахь удаагаа хүртэж байсан жүжигчин Б.Амарсайхан шилдэг дебют киноны шагналыг тодруулахаар гарч ирлээ.

Энэ удаад 

-Өнөөдөр

-Аав

-Тютю

-Хүдэн

-Хүүхэлдэй кинонууд нэр дэвшиж байгаа юм.

  "Тютю" киногоороо жүжигчин Г.Ундармаа "Шилдэг дебют кино"-ы шагналыг авлаа.

"Шилдэг баримтат кино"-ы номинацид

"Монгол Регби" - Б.Жаргалсайхан

-"Тайгын жимээр цэцэрлэгтээ очно" - З.Батбилэг

-"Тавилан" - Г.Золжаргал  тус тус нэр дэвшиж байна.

 "Шилдэг баримтат кино"-оор СГЗ сэтгүүлч найруулагч Г.Золжаргалын "Тавилан" бүтээл шалгарлаа.

Тэрбээр "Манай аав өөрөө баримтат киноны хүн. Ээж маань 50 жил аавын хоолыг хийсэн. Намайг кинонд явахад 40 жил хоол хийсэн. Одоо манай хүүд 10 жил хоол хийж байна. Арын албыг авч явдаг ээждээ энэ шагналыг зориулъя" гэлээ.

"Богино хэмжээний кино" номинацид

-У.Пүрэвжав "Уулын эзэн"

-С.Ванчин  "Эх хүн"

-Сосорбурам "Эхийн сэтгэл"

-Б.Мөнхзаяа "Хайр" кинонууд нэр дэвшсэнээс У.Пүрэвжав "Уулын эзэн" киногоороо шалгарлаа.

Академийн шагналт Б.Чингүүн тайзнаа гарч ирж  "Шилдэг дууны найруулагч"-ийг тодруулахаар гарч ирлээ.

"Шилдэг дууны найруулагч" номинацид

-Г.Хишигбүрэн "Аюултай харилцаа"

-Б.Баярхүү "Ар хударга"

-Б.Батболд "Аав"

-М.Болд "Тютю"

-Э.Амартүвшин "Учрал" нэр дэвшсэнээс Б.Баярхүү "Ар хударга" киногоороо авлаа.

"Шилдэг дуу"-ы шагналыг "Аюултай харилцаа" киноны дуугаар Э.Агиймаа хүртлээ.

Тэрбээр "Би энэ наадмаас шагнал авна гэж бодсонгүй. Уран бүтээлчид та бүхэнд маш их баярлалаа" гэв.

"Шилдэг хөгжмийн зохиолч" номинацид,

-Г.Хишигбүрэн "Аюултай харилцаа"

-Б.Баярхүү "Ар хударга"

-Б.Одбаяр "Амьдрал нулимсанд дургүй"

-Н.Халиун "Сүүлчийн шөнө"

-Б.Одбаяр "Аав"

-Б.Эрдэнэбат "Хүдэн"

-Л.Энх-Амгалан "Хүүхэлдэй" нэр дэвшиж байна.

"Шилдэг хөгжмийн зохиолч"-оор "Амьдрал нулимсанд дургүй" киногоороо Б.Одбаяр тодорлоо.

Тэрбээр "Хамтран ажилласан бүх уран бүтээлчдэдээ баярлалаа. Сая шагнал хүртсэн Б.Баярхүү ахаасаа их зүйл сурсан шүү. Маш их баярлалаа" гэв.

Шилдэг туслах эмэгтэй дүр номинацид

-Х.Баярмаа "Аюултай харилцаа"

-С.Сарантуяа "Аав"

-А.Цэгмэд  "Хүдэн"

-М.Саранцэцэг "Хүүхэлдэй" дэвшиж байна.

"Шилдэг туслах эмэгтэй дүр" шагналыг "Хүдэн" кинонд тоглосон А.Цэгмэд хүртлээ.

Жүжигчин А.Цэгмэд "Баярын нулимсыг унагаахгүй залгих хэрэгтэй. Юуны өмнө "Academy awards"-т баярлалаа.1965 онд урлаг гэдэг агуу орон зайд хөл тавьсны дараа ийм том шагналыг анх удаа авч байна. Хамгийн сайн шавь багшийгаа мартдаг. Гэвч би талархлын үгээ тэнгэрийн оронд байгаа Оюун, Маамхүү багш нартаа хэлмээр байна. Танхимд байгаа залуучууд та бүхнээс би бас их суралцдаг. Гуравхан хоногийн өмнө "Марко поло" кинонд тэнцсэн гэсэн мэдээ ирлээ. Та бүхнийгээ орхиод олон хоногоор явлаа" гэсэн юм.

"Шилдэг дүрсний эффект" шагналыг Ч.Түвшинтөгс "Хүүхэлдэй" киногоороо хүртлээ.

"Шилдэг туслах эрэгтэй дүр" номинацид

-С.Ариунбямба "Аюултай харилцаа"

-Д.Сэлэнгэ "Ар хударга"

-Ч.Алтан-Өлзий "Аав"

-Н.Төмөрбат "Хүдэн"

-Б.Баттөмөр "Ээж ээ надтай гэрлээч"

-Б.Барслхагва "Код"

-Э.Алдар "Учрал"

-Ө.Мөнгөнтулга "Хүүхэлдэй" нар нэр дэвшээд байна.

"Шилдэг туслах эрэгтэй дүр"-ийн шагналыг "Ээж ээ надтай гэрлээч" кинонд тоглосон Б.Баттөмөр хүртлээ.

"Шилдэг зураглаач"-аар

Н.Баттуяа "Аюултай харилцаа"

Б.Баатар "Ар хударга"

Ц.Энхцогт "Амьдрал нулимсанд дургүй"

Б.Отгонзориг "Сүүлчийн шөнө"

О.Базаррагчаа "Аав"

О.Базаррагчаа "Тютю"

Э.Нэргүй "Донор"

Г.Хосбаяр "Учрал" нар нэр дэвшээд байна.

"Шилдэг зураглаач"-аар "Аав" киногоороо О.Базаррагчаа тодорлоо.

"Шилдэг эвлүүлэгч" номинацид

-Түмэн "Амьдрал нулимсанд дургүй"

-Б.Билгүүн "Ар хударга"

-О.Хантүшиг "Аав"

-Д.Төгсбаяр "Учрал" өрсөлдөж байна.

"Шилдэг эвлүүлэг" шагналыг "Учрал" киноны эвлүүлэгч Д.Төгсбаяр хүртлээ.

"Шилдэг хөрөнгө оруулагч"-аар "Сүүлчийн шөнө" киноны Б.Дэлгэрсайхан  шалгарлаа.

"Шилдэг зохиол" номинацид

-Б.Буяндэлгэр "Өнөөдөр"

-Ц.Хүсэлбаатар, Т.Амар "Аюултай харилцаа"

-Д.Болдбаатар "Ар хударга"

-Н.Наранбаатар "Сүүлчийн шөнө"

-М.Энхдалай "Аав"

-Л.Таванбаяр "Хүдэн"

-Л.Балхжав "Учрал" бүтээлүүд өрсөлдөж байна.

"Шилдэг кино зохиол"-оор "Аав" киноны зохиолч М.Энхдалай шалгарлаа.

"Шилдэг эмэгтэй дүр"-ийн номинацид,

-Г.Отгонцэцэг "Аюултай харилцаа"

-О.Долгор "Ар хударга"

-Н.Баярмаа "Сүүлчийн шөнө"

-Б.Мөнхдэлгэр "Аав"

-М.Цэрэндолгор "Тютю"

-О.Дөлгөөн "Учрал"

-Ч.Ундрал "Ээж ээ надтай гэрлээч"

-Н.Мөнхсоёл "Хүүхэлдэй" нэр дэвшээд байна.

"Шилдэг эмэгтэй дүр"-ийн шагналыг "Ар хударга" киноны гол дүрээр жүжигчин О.Долгор хүртлээ.

"Шилдэг эрэгтэй гол дүр"-ийн номинацид

-Э.Мөнхтөр "Аюултай харилцаа"

-Г.Эрдэнэбилэг "Ар хударга"

-Ц.Цэрэнболд "Аав"

-Б.Шинэбаяр "Аав/"

-О.Гэрэлсүх "Тютю"

-П.Баатар "Донор"

-А.Алтанхуяг "Үндэсний баялаг" нар нэр дэвшиж байна.

"Шилдэг эрэгтэй гол дүр"-ийн шагналыг "Аав" киноны Ц.Цэрэнболд хүртлээ.

"Шилдэг найруулагч"-ийн шагналыг "Аав" киногоороо Г.Эрдэнэбилэг авлаа.

Шилдгийн шилдэг бүтээлээр "Аав" кино шалгарч таван сая төгрөгөөр шагнууллаа.