БСШУЯ-ны бага дунд боловсролын газрын дарга Г.Батболд мэргэжилтэн Ц.Лувсандорж, Санхүү эдийн засгийн газрын дарга Ц.Даваасүрэн, сурах бичгийн асуудал хариуцсан мэргэжилтэн Н.Давааням нарын бүрэлдэхүүнтэй БСШУЯ-ны мэргэжилтнүүд жил бүрийн хичээлийн шинэ жилд ЕБС-д 1 сая төгрөгийн чанаргүй сурах бичиг шахсаар байдаг тухай холбогдох хүмүүсээс гомдол ирсээр байна. Харин дээрх явдал нь хэн бүхний сайн мэддэг ч хэлж ярьж чаддаггүйгээс өдийг хүртэл дарагдсаар ирсэн асуудал. Жил бүрийн хичээлийн шинэ жилийн ном хэвлэх тендерт өрсөлдөхөөр нэр бүхий томоохон хэвлэх үйлдвэрүүд хамрагддаг ч тэднээс чанартай нь бус эрх мэдэлтнүүдийн арга эвийг олж чадсан нь ялдаг гэх яриа бий. БСШУЯ-нд Сурах бичгийн тендерийн хороо хэмээх сүржин нэртэй байгууллага ажиллах ч үйл ажиллагаа бүтэц бүрэлдэхүүн нь хэн бүхний санаанд хүрдэггүй юм байх.

2007-2008 оны хичээлийн жилд ном хэвлэх тендерийн материалыг тус яамны мэргэжилтэн Н.Давааням ганцаар хүлээж авсан сурагтай. Тэр ч байтугай манайдаа нэртэй нэгэн компанийн эзэн тендерийн материал битүүмжлэх өрөөний түлхүүр цоожийг бариад гүйж явсан гэдгийг гэрчлэх хүмүүс ч байх аж. Үнэндээ тэр нөхөр тухайн жилийн ном сурах бичгийн тендерийн материал хүлээн авахад ямар ч хамааралгүй хөндлөнгийн хүн байсан аж.

Үүнээс үүдэн дээрх түлхүүр цоожиы асуудлаар өрсөлдөгч компаниуд нь маргаан үүсгэж нийслэлийн захиргааны хэргийн шүүхээр заргалдсан. Гэвч маргаан шийдэгдэлгүй хойшлогдсоор тендер зарлагдах ёстой 21 хоног дууссаны эцэст яалт ч үгүй өрсөлдөгч хэвлэх үйлдвэрүүд нь шүүхээс нэхэмжлэлээ татаж авчээ.

"Иргэншил" сурах бичгийг хэвлэхээр өрсөлдсөн цөөнгүй хэвлэх үйлдвэрүүдийн бүтээл сурагчдад үйлчлэх сонголт дээрээ тулаад ирэх үед мөн л сургуулийн захирлууд үйлдвэрийн эздийн хуйвалдаан болж хувирдаг тухай эцэг эхчүүдийн бухимдал, зөрчилд хүрээд байгаа бололтой.