Монгол Улсад хэрэгжих мега төсөл болох “Алтанбулаг – Улаанбаатар – Замын-Үүд” чиглэлийн хурдны авто замын төслийн нээлт өнөөдөр Замын-Үүд суманд боллоо.

Төслийн нээлтэд Замын –Үүд сумын засаг дарга М.Баянмөнх, Замын –Үүд дэх гаалийн газрын дарга Б.Хишигбат, Эрээн хотод суугаа Консулын газрын төлөөлөгчид, Замын –Үүд Чөлөөт бүсийн төлөөлөгчид,  Эрээн хотын замын газрын орлогч дарга Луо Вэй, урд хойд хөршийн компаниудын төлөөлөл , Замын –Үүд дэх Иргэний харьяалал шилжилт хөдөлгөөний газрын дарга Г.Эрдэнэцогт,  Дорноговь аймгийн ИТХ-ын төлөөлөгчдийн дарга Ч.Эрдэнэбат зэрэг зочид төлөөлөгчид оролцсон байна.  

Зам барилгын ажлын явцад 20-30 мянган түр ажлын байр, амралт үйлчилгээний цогцолбор, замын байгууламжуудын хэсгүүдэд 3000-5000 ажлын байр, зам дагуу бий болох шинэ суурьшлын бүсүүдийг дагаад 50 мянга хүртэл ажлын байр бий болно гэж тооцсон байна.

Их бүтээн байгуулалтын төслийн нээлтэд оролцогчид энэ төсөл дээр хамтран ажиллахаа илэрхийллээ. Ази Европыг холбосон энэ хурдны зам нь Монгол Улсын хөгжилд их хувь нэмэр оруулна хэмээн нээлтэд оролцогчид ам сайтай байв.

Энэхүү бүтээн байгуулалтад үндэсний компаниудыг оролцуулах, зам барилгын ажилд оролцох монгол ажилчдын тоог нэмэгдүүлэх, үндэсний мэргэжилтэй инженер, техникийн ажилтан бэлтгэхэд хамтран ажиллах санамж бичгийг өнгөрсөн лхагва гаригт “Чингис Лэнд Девелопмент Групп”, Монголын Үндэсний Худалдаа Аж Үйлдвэрийн Танхим, Монголын Авто Замчдын Холбоо хамтран байгуулсан аж.  Ингэснээр  төсөл хэрэгжих хугацаанд манай улсын үндэсний аж ахуйн нэгж компаниуд уг бүтээн байгуулалтад оролцон, олон улсын томоохон корпорациудтай хамтран ажиллах боломж бүрджээ.

Зам барилгын ажлын явцад 20-30 мянган түр ажлын байр, амралт үйлчилгээний цогцолбор, замын байгууламжуудын хэсгүүдэд 3000-5000 ажлын байр, зам дагуу бий болох шинэ суурьшлын бүсүүдийг дагаад 50 мянга хүртэл ажлын байр бий болно гэж тооцсон байна.

“Алтанбулаг–Улаанбаатар– Замын-Үүд чиглэлийн хурдны авто зам” төслийг хэрэгжүүлэх Концессын гэрээг өнгөрсөн оны гуравдугаар сард байгуулж улсын төсөвт хүндрэл учруулахгүйгээр зөвхөн хувийн хэвшлийн санхүүжилтээр хэрэгжүүлэхээр болсон нь бас нэгэн давуу тал болов.
Зам барилгын ажлыг гурван жилийн хугацаанд барьж, 30 жил ашиглан төрд шилжүүлэх гэрээтэй.

Хурдны авто зам нь Монгол Улсын зургаан аймгийн 24 сум, нийслэлийн хоёр дүүргийн нутгийг дайран өнгөрөх бөгөөд нийтдээ 990 орчим км үргэлжилнэ.

“Чингис Лэнд Девелопмент Групп” өнгөрсөн нэг жилийн хугацаанд хурдны замын трассыг тогтоож чадсан юм. Түүнчлэн ЗТЯ-ны харъяа Шинжлэх ухаан технологийн зөвлөлөөр дэмжүүлж,  олон улсын зөвлөх компаниудын оролцоотойгоор ТЭЗҮ-ээ  боловсруулсан байна. 

Мөн Зам тээврийн яамны харьяа Шинжлэх ухаан технологийн зөвлөлөөр дэмжүүлсэн, ОХУ-ын геотехникийн компаниар ахлуулан Монгол Улсын 20 гаруй компанийн оролцоотой хурдны замын трассын дагуу Алтанбулаг-Улаанбаатар-Мааньт чиглэлийн 450 км газарт геотехникийн /геодези, инженер-геологи, гидрометерологи/ суурь судалгааг хийсэн зэрэг ажлыг амжуулжээ.