Булган аймгийн Баяннуур сумын нутгаас олдсон "Шороон бумбагар"-ын олдвор буюу  эртний Түрэгийн үеийн язгууртны бунхант дурсгалт газрыг авран хамгаалах төсөл хэрэгжиж байгаа юм.

Энэ төслийг БСШУЯ Туркийн талтай хамтран хэрэгжүүлэх юм. 

2011 онд нээсэн энэ бунхны хананы зарим хэсэгт мөөгөнцөр үүсч, газрын хөрсөн дээр зурсан 1300 жилийн настай зургууд бүдгэрч эхэлсэн. Иймд авран хамгаалах ажлыг даруй эхлүүлэх шаардлагатай. Одоогоор бунхнаас олдсон алт мөнгөн эдлэл, ховор сонин баримал, эртний зоосыг Хархорины музейд хадгалж байна. Эдгээрийг нийслэлд авчран, Үндэсний түүхийн музейд дэлгэжээ. 

Орхоны хөндийд байрлах "Шороон бумбагар"-ын ойр орчим үүнтэй төстэй  10 орчим булш байгааг судлаачид тогтоосон. Хархорин, Өгий нуур зэрэг аялал жуулчлалын бүс нутагт ойрхон байршилтай учир цаашид энэ газрыг цогцолбор хэлбэрээр хөгжүүлж, аялал жуулчлал хөгжүүлэх боломж бий. Өөрөөр хэлбэл дэлхийд ховорт тооцогддог архиеологийн олдвороо эдийн засгийн эргэлтэд оруулах бүрэн боломжтой.  

• Энэ төслийг хамтран хэрэгжүүлэх Туркийн хамтын ажиллагаа, хөгжлийн агентлаг (ТИКА) нь 1994 оноос хойш Монголд албан ёсоор үйл ажиллагаагаа явуулж байна. Тэд өнөөдрийг хүртэл олон сая ам.долларын өртөг бүхий төсөл хөтөлбөрүүд хэрэгжүүлсэн. Тухайлбал, Улаанбаатар хотод Турк-Монголын цусны төв,
• Хархорин хотод Хөшөө Цайдамын музей,
• 46 км бүхий Билгэ Хааны зам,
• Налайх дүүрэгт 11 км бүхий мэргэн Тонюкукийн зам зэргийг барьж байгуулсан төдийгүй Хөвсгөлийн цаатан иргэдийн цаа бугын цусыг сэлбэх зорилгоор 20 ширхэг цаа буга бэлэглэжээ.

Гэрэл зургуудыг Б.Бямба-Очир